Duket se nuk po gjejnë qetësi italianët nga fatkeqësitë natyrore që po ndodhin atje kohëve të fundit. Një ortek gjigand ka goditur këtë të mërkurë një prej resorteve në provincën e Peskaras, Farindola. Gjatë natës së mbrëmshme kanë rënë mbi 80 tërmete duke bërë që orteku gjigand i dëborës të shkeputej e të godiste resortin Rigopiano, duke e shkatërruar plotësisht. Forcat e ndihmës së shpejtë e kanë patur tepër të vështirë për të shkuar në vendngjarje, pasi sasia e dëborës ishte tepër e madhe. Antonio Crocetta, i cili është kreu i ekipit të shpëtimit malor, është shprehur se ka shumë të vdekur. Mendohet se në hotel ndodhen rreth 30 persona, përfshirë edhe fëmijë. Deri më tani është raportuar një person i vdekur. Kjo provincë u godit më 24 gusht të vitit të kaluar nga një tërmet ku mbetën të vdekur 298 persona.