Një duartrokitje për Lars von Trier, 100 shikues largohen nga salla gjatë premierës së filmit në Kanë! 0 417

Një tjetër sukses për Lars von Trier. Sepse, do të ishte vërtetë e çuditshme nëse nuk do të ndodhte diçka e tillë. Po flasim për një nga regjisorët më të diksutuar të dekadave të fundit, imagjinata dhe talenti i së cilit vështirë të shpjegohen me të parën. Çfarëdo që mban firmën e von Trier, është sa artistike, aq dhe shqetësuese e brutale.

Ndërthurja e seksit dhe dhunës dhurojnë ndjenjën e diskomfortit, që jo shumë regjisorë arrijnë të përcjellin. Sepse, siç e kanë pranuar shumë kineastë: ç’kuptim ka kinemaja nëse nuk të sikletos sadopak?! Emocion – këtë përcjell danezi, i cili ia ka arritur dhe një herë të bëjë bujën e nevojshme në Festivalin e Kanës. Filmi më i fundit, ‘The House That Jack Built’ nuk është pranuar të jetë pjesë e konkursit mes veprave të tjera, por nuk është mohuar të mbajë premierën në ambientet e festivalit. Shkak për një vendim të tillë është bërë dhuna ekstreme që shpërfaq filmi, gjë që ka ‘detyruar’ plot 100 spektatorë të lënë karriget e kinemasë e të dalin nga salla. Ata e kanë quajtur filmin skandaloz, të tmerrshëm dhe të përgjakshëm, ashtu sikurse (si gjithmonë) ka patur dhe një pakicë që e kanë duartrokitur krijimin më të ri të Lars von Trier.

Referuar një vrasësi serial, skenat në film përshkruhen si ‘të rënda’ vizualisht, gjë që e karakterizon së shumti stilin e regjisorit. Ndonëse për komercialët ky do të quhej një dështim, zakonisht kinefilët janë në dijeni të plotë se largimi i menjëhershëm i spektatorëve nga salla është një shenjë e mirë, që karakterizon jo rrallë herë ato çka ndryshe quhen filma kult. Prodhimi zgjat rreth dy orë e gjysmë, e kushdo që po pret ta shohë me padurim, bën mirë të nxitojë, pasi von Trier ka premtuar shumë…!

Previous ArticleNext Article