Ditë më parë lajmi se një baba shqiptar në Australi kishte vrarë vajzën e tij 20-vjeçare shokoi mbarë opinionin publik. Petrit Lekaj goditi me thikë të bijën në makinën e tij duke i marrë jetën për shkak se ajo kaloi mbrëmjen me shoqërinë në një festë.
Petrit Lekaj, 49 vjeç akuzohet se ka vrarë vajzën e tij, Sabrina Lekaj 20 vjeçe. Ajo ishte studente në universitetin e Australisë Jugore, ku mësohet se ishte një studente me rezultate të larta.
Ditën e djeshme Sabrina është përcjellë për në banesën e fundit dhe “Daily Mail Australia” ka publikuar pamjet rrënqethëse ku e ëma, vëllai i vogël dhe miqtë i japin lamtumirën e fundit.
Në pamje duket arkivoli rozë i 20-vjeçares me disa foto të buzëqeshura të saj, diploma (thuhej se e ndjera ishte me rezultate të shkëlqyera në studime) dhe një foto me piano pasi merte mësime muzike.
I vëllai i të ndjerë ka lëshuar në qiell 20 tollumbace të bardha ndërsa e ëma e Sabrinës duket e shkatërruar nga dhimbja teksa mban të birin në krah.
Sipas Daily Mail, i ati i Sabrinës mungonte në ceremoninë mortore. 49-vjeçari ndodhet ende në spital nën mbikëqyrjen edhe të forcave policore dhe nuk dihet nëse ai ka kërkuar të marrë pjesë në ceremoninë mortore të së bijës.