KreuFashion

Shkelën rregullat e Covid-19: AMA nis procedim ndaj Tv Klan dhe Top Channel!

Që në nisje të pandemisë së Covid-19 në vendin tonë, shumë programe televizive u detyruan të ndërpresin transmetimet për shkak të ndalimit të përhapjes së infeksionit.

Ato programe që vijuan me transmetimet edhe gjatë këtyre ditëve, kanë qenë të detyruar të respektojnë rregullat e paracaktua nga Ministria e Shëndetësisë, për të patur në studio vetëm 2 persona dhe duke ruajtur distancën e sigurisë.

Por duket se dy prej programeve që kanë vijuar transmetimin përkatësisht ‘Open’ nē Top Channel dhe ‘Klanifornia’ në Tv Klan duket se nuk i kanë respektuar këto rregulla dhe Autoriteti i Mediave Audiovizive (AMA) ka bërë me dije pak më parë se do të nisë procedimin administrativ për dy rastet e konstatuara si shkelëse rregullash.

Njoftimi i AMA-s

“Nga evidentimi i rasteve më të fundit në programet “Open” në televizionin Top Channel dhe “Klanifornia” në televizionin Klan, për prezencë të më shumë se dy personave në studio, AMA falenderon për mirëkuptimin autoritetin shëndetësor për mosaplikimin këtë herë të gjobave të parashikuara për këto shkelje të Aktit-Normativ në kushtet e pandemisë.

AMA i ka kërkuar autoritetit shëndetësor të marrë në konsideratë gjendjen e vështirë financiare dhe e ka siguruar atë se do të përcjellë tek të gjithë operatorët audiovizivë shqetësimin e krijuar nga dy rastet e lartpërmendura, duke vlerësuar lart punën e kontributin e tyre publik në përballimin me sukses të situatës së pandemisë, por edhe kërkuar prej tyre respektimin rigoroz të udhëzimeve përkatëse.

Nga monitorimet e realizuara për përmbajtjet e transmetuara është vërejtur se nga televizionet po zbatohen masat e parashikuara për mbrojtjen e stafit që punon në mjediset brenda dhe jashtë redaksive, por ky proces duhet të vijojë me rigorozitet dhe përgjegjësi maksimale deri në përfundim të procesit dhe rikthimin në normalitet.

Sikundër dhe në njoftimet e mëhershme që AMA ka drejtuar, subjektet audio dhe audiovizive duhet të respektojnë vendimet dhe udhëzimet e bëra publike nga Ministria e Shëndetësisë, në kuadër të vendosjes së gjendjes së fatkeqësisë natyrore në Shqipëri.

Duke e konsideruar parësore mbrojtjen e shëndetit të stafit të angazhuar dhe bashkëpunëtorëve, për të mënjanuar efektet e padëshiruara nga raste të përhapjes së infeksionit të shkaktuar nga COVID-19, AMA tërheq vëmendjen se për rastet e konstatuara do të nisin procedimet administrative.”

Bordo
Shtator - No.63

SHKARKO VERSIONIN PDF