Steve Harwell, këngëtari i grupit pop rock Smash Mouth, ka vdekur në moshën 56-vjeçare si pasojë e dështimit të mëlçisë, konfirmoi menaxheri i tij për TMZ të hënën (4 shtator).
Sipas menaxherit, Harwell vdiq i rrethuar nga familja dhe miqtë në shtëpinë e tij në Boise, Idaho, të hënën në mëngjes. Të dielën, mediat raportuan se Harwell ishte në shtratin e vdekjes disa orë përpara konfirmimit të vdekjes së tij.
56-vjeçari luftoi gjatë gjithë jetës së tij me abuzimin me alkoolin dhe së fundmi iu nënshtrua trajtimit në spital.
Harwell njoftoi tërheqjen nga muzika në vitin 2021 pas një incidenti në një shfaqje live në pjesën veriore të Nju Jorkut, në të cilën ai ngatërroi fjalët dhe u bërtiti anëtarëve të stafit ndërsa dukej i çorientuar.
“Që kur isha fëmijë, kam ëndërruar të isha një Rockstar duke performuar para arenave të mëdha dhe kam qenë shumë me fat që ta realizoj atë ëndërr. Për shokët e mi të grupit, ishte një nder të performoja me ju gjatë gjithë këtyre viteve”; tha Harwell në postimin e tij të lamtumirës nga muzika.
Smash Mouth arriti sukses komercial me një varg hitesh në fund të viteve 1990, duke përfshirë këngën e tyre ikonike “All Star”, e cila u nominua për Performancën më të Mirë Pop në edicionin e 42-të të GRAMMY dhe u shfaq më pas në filmin e famshëm për fëmijë Shrek.
