Si ti kthehesh palestrës pas një periudhe pushimi!

Nga Krist Bibolli
Trajner Personal

Sezonit të verës i erdhi fundi. Për disa prej nesh është e vështirë të rrinë larg palestrës e stërvitjes. U munduam t’i mbajmë sa më shumë nën kontroll humbjet muskulare e dhjamosjen gjatë pushimeve, ndaj tani është koha të kthehemi përsëri në formë.

Në rradhë të parë, hidratohu e detoksifikohu. Nuk të duhen çajrat, bimët apo ndonjë lloj manie ekzotike për këtë të fundit. Në shumicën e rasteve nuk funksionojnë siç reklamojnë etiketat. Thjesht pi shumë ujë dhe bëj seanca të gjata kardio me ritëm konstant. (Steady State Cardio). Për shembull seanca nga 40 minuta me intensitet mesatar në stairmaster, biçikletë ose step. Pse jo një ecje të shpejtë në natyrë?! Kjo do të nxisë qarkullimin e lëngjeve në trup, djersitjen dhe largimin e toksinave. Lëre trupin të pastrohet, me siguri i duhet.

Së dyti, kontrollo të ngrënët dhe nutrientët. Është e thjeshtë të dalësh nga regjimi ushqimor kur je me pushime. Në shumicën e rasteve shoqëria apo prindërit nuk e vrasin mendjen për këtë aspekt. Planifikimi i ditës është komplet i rastësishëm. Nuk dihet se ku dhe kur do të kesh mundësi të hash vaktet dhe, a do marrësh vlerat ushqyese që i duhen trupit tënd. Pra, këto ditë me siguri do të hash ç’të kesh mundësi. Hamburger, patate, patatina e yndyrna të këqija që të nxjerrin sistemin nga ekuilibri. Veç të tjerash është e vështirë të marrësh proteinën në sasinë e duhur për të mirëmbajtur masën muskulare ekzistuese, kështu që ajo mund të bjerë pak. Megjithatë, çfarë u bë, u bë. Është koha të lëmë pas anët negative dhe t’i kthehemi sa më shpejt regjimit ushqimor dhe stërvitjes. Pastroje dietën: sigurohu që merr sasinë e duhur të makro dhe mikro-nutrientëve. Kombinoje me kardion dhe stërvitjen e duhur dhe në shumë pak kohë do të kthehesh në gjendjen e mëparshme fizike, ndoshta edhe më të mirë.

Ndërkohë që je pasiv, trupi ka tendencën të humbasë disa aftësi të caktuara. Mund të kesh humbur një pjesë të fleksibilitetit që kishe. Dehidratimi dhe mungesa e aktivitetit e ndihmojnë këtë proces. Kështu që përpara se ti kthehesh Squat-it me 100kg që ditën e parë, sigurohu që të bësh stretching dinamik e statik. Lëri fibrat të tërhiqen, muskulaturën të ç’tensionohet e gjymtyrët të fitojnë harkun e duhur të lëvizjes. Bëje përpara çdo seance. Në këtë mënyrë ul shumë riskun e dëmtimit. Askush nuk do të dëmtohet që javën e parë të kthimit e të kalojë muaj të tërë duke u rikuperuar.

Tani trupi është hidratuar, ushqimi dhe nutrientët janë nën kontroll dhe në sasinë e duhur, sistemi është pastruar dhe nxehur. Ke gjetur programin e vjetër diku në tavolinë dhe mendon se je gati të shkosh të vendosësh ndonjë rekord të ri. Mos e bëj! Edhe pse mund të jesh shumë në qejf e të ndihesh plot forcë, nuk je gati. Aftësia e parë që trupi humbet nëse nuk stërvitet fort, është përshtatja neurale. Domethënë truri nuk është i aftë të vendosë të gjitha fibrat në punë si më parë. Bën sens apo jo? Kjo ngaqë nuk i nevojiten më të gjitha. Përderisa nuk i përdor më, trupi si mekanizëm efiçient, përshtatet shumë shpejt. Pa merak, rifitohet po aq shpejt kjo aftësi. Ule ngarkesën me 30 për qind (varet nga sa kohë ke qenë pasiv) dhe fillo të ngrihesh pak nga pak. Mos puno me ego. Tregohu i zgjuar dhe do të vendosësh rekorde të reja shumë shpejt. S’ja vlen të nxitosh t’i provosh vetes asgjë. Përkundrazi duke lënë gjithmonë pak energji rezervë e duke mos dhënë maksimumin, do ndihesh sikur çdo herë mund të bësh me shumë.

Duke aplikuar gjithë ç’ka këshillova më sipër edhe te vetja ime, pas 10 ditë pushimesh, m’u deshën 3 javë të kthehem në pikën ku isha ditën që ika. Mund të të duhet më shumë, mund të të duhet më pak, por pse ta zgjatësh edhe më tepër duke mos filluar. Sa më shumë pret, aq më shumë kohë do ti duhet trupit të ripërshtatet. Mos prit, fillo sot!. Ska rëndësi nëse është e hënë apo e dielë, shi apo diell. Pas një muaji, as që do ta mbash mend çfarë dite ishte. Do jesh shumë i zënë duke shijuar rezultatet.

Botuar në revista BORDO

easy dinner ideas
Previous ArticleNext Article