Kupa e Botës 2026 ka nisur zyrtarisht në Mexico City me një ceremoni madhështore të mbushur me ngjyra, vallëzime dhe performanca nga yje të muzikës botërore si Shakira.
Mijëra tifozë mbushën stadiumin legjendar Azteca, duke sjellë një atmosferë të jashtëzakonshme entuziazmi për Botërorin e parë që zhvillohet në Meksikë pas 40 vitesh.
Megjithatë, jashtë stadiumit pati përplasje sporadike mes protestuesve radikalë dhe forcave të sigurisë. Autoritetet meksikane njoftuan se rreth 200 persona të maskuar u shkëputën nga dy grupe protestuesish dhe u përleshën me policinë, duke shkaktuar mbylljen e përkohshme të disa stacioneve të metrosë pranë stadiumit.
Përveç protestave, mësues dhe familjarë të personave të zhdukur gjatë luftës kundër drogës në Meksikë marshuan për të tërhequr vëmendjen ndërkombëtare ndaj kauzave të tyre.
Në fushë, Meksika e nisi në mënyrën më të mirë aventurën në Botëror, duke mposhtur Afrikën e Jugut me rezultatin 2-0.
Tifozi Javier Pérez, i cili ndoqi ndeshjen së bashku me familjen, tha se emocionet e këtij eventi janë të papërshkrueshme.
“Jemi me fat që siguruam bileta. Është hera ime e parë në një Kupë Bote dhe është fantastike ta përjetoj këtë me familjen,” u shpreh ai.
Ceremonia hapëse solli në skenë artistë të njohur ndërkombëtarë si Shakira, J Balvin, Burna Boy dhe Danny Ocean. Ndërkohë, këngëtari meksikan Fher Olvera interpretoi hitin klasik “Oye Mi Amor”.
Spektakli u shoqërua me performanca tradicionale, ku artistët mbanin veshje indigjene dhe elemente të kulturës meksikane, ndërsa stadiumi ishte i mbushur me tifozë të veshur me ngjyrat e kombëtares së Meksikës.
Andrea Bocelli dhe këngëtarja koreano-jugore Ejae performuan himnin zyrtar të turneut “DNA”, ndërsa Alejandro Fernández këndoi himnin kombëtar të Meksikës së bashku me mbi 80 mijë tifozë në stadium.
Nga ana tjetër, artistja afrikano-jugore Tyla interpretoi himnin e Afrikës së Jugut dhe pritet të marrë pjesë edhe në ceremoninë hapëse në Los Angeles, ku do të performojnë gjithashtu Katy Perry, Future, Lisa dhe Anitta.
Meksika po bashkëorganizon Kupën e Botës 2026 së bashku me Shtetet e Bashkuara dhe Kanadanë, ndërsa ceremonia hapëse ka dhënë sinjalin për nisjen e një prej eventeve më të mëdha sportive në botë.
Galeria fotografike
