Dy vite e gjysmë pas largimit të tij emocional nga Liverpooli, Jürgen Klopp është rikthyer zyrtarisht në drejtimin e një skuadre. Trajneri 59-vjeçar është prezantuar si përzgjedhësi i ri i kombëtares gjermane, duke marrë përsipër një nga sfidat më të rëndësishme të karrierës së tij.
Kur njoftoi largimin nga Liverpooli, Klopp deklaroi se po i “mbaronte energjia”, ndërsa shumë tifozë menduan se ai nuk do të drejtonte më një klub apo skuadër tjetër. Megjithatë, drejtimi i Gjermanisë ishte oferta së cilës ai nuk mund t’i thoshte jo.
Gjatë gjithë Kupës së Botës, Klopp ishte i pranishëm në ndeshjet e Gjermanisë si analist për televizionin MagentaTV. Ai e ndoqi nga afër rrugëtimin zhgënjyes të kombëtares, e cila u eliminua nga Paraguai pas goditjeve të penalltive në fazën e 1/32-ave.
Pas shkarkimit të Julian Nagelsmann, emri i Klopp u kthye menjëherë në alternativën kryesore të Federatës Gjermane të Futbollit. Emërimi i tij u zyrtarizua të premten në Frankfurt, ku ish-trajneri i Liverpoolit nuk e fshehu emocionin për aventurën e re.
“Është një nder i madh për mua që ndodhem sot këtu. Ky është ndoshta kulmi i karrierës dhe i jetës sime profesionale. Do të jap gjithçka që kam. Kombëtarja na bashkon ne gjermanët si pothuajse asgjë tjetër dhe kjo është ajo që e bën këtë detyrë kaq të veçantë”, deklaroi Klopp gjatë prezantimit.
Presidenti i Federatës Gjermane, Bernd Neuendorf, pranoi se Klopp kishte qenë zgjedhja e parë dhe pothuajse e vetme e drejtuesve.
“Jürgen ishte zgjidhja jonë ideale që nga fillimi. Ishim unanimë se ai ishte kandidati me të cilin duhej të bisedonim. Takimet tona vetëm sa e forcuan bindjen se ai është njeriu i duhur, në momentin e duhur”, u shpreh Neuendorf.
Klopp merr drejtimin e Gjermanisë në një prej periudhave më të vështira të historisë së saj të fundit. Nga viti 2006 deri në vitin 2016, “Die Mannschaft” arriti të paktën në gjysmëfinale në gjashtë turne të mëdhenj radhazi, duke fituar edhe Kupën e Botës në vitin 2014.
Që prej asaj kohe, situata ka ndryshuar ndjeshëm. Gjermania ka fituar vetëm një ndeshje me eliminim direkt në pesë turnetë e fundit, ndërsa humbja e muajit të kaluar kundër Paraguait vulosi një tjetër dështim të rëndë.
Sfida e parë e Klopp do të jetë në Ligën e Kombeve, ku Gjermania do të përballet me Holandën, Greqinë dhe Serbinë. Debutimi i tij do të vijë më 24 shtator në Amsterdam, pikërisht kundër rivalëve historikë holandezë.
Dy skuadrat e para të grupit do të kualifikohen në çerekfinalet e Ligës së Kombeve, një objektiv që konsiderohet plotësisht i arritshëm për Gjermaninë. Megjithatë, fokusi kryesor mbetet Kampionati i ardhshëm Europian, që do të zhvillohet në Mbretërinë e Bashkuar.
Herën e fundit kur Anglia organizoi Europianin, në vitin 1996, ishte pikërisht Gjermania që ngriti trofeun në Wembley. Tashmë, Klopp ka përpara misionin për ta rikthyer kombëtaren mes fuqive të futbollit botëror.
