Vetëm pak orë pas një prej netëve më të mëdha në karrierën e tij, Lamine Yamal është përballur me një situatë shqetësuese jashtë fushës së futbollit.
Sipas raportimeve nga mediat spanjolle, dy persona me kapuç kanë tentuar të hyjnë në vilën e sulmuesit të Spanjës, në periferi të Barcelonës, me qëllim grabitjen. Tentativa e tyre, megjithatë, ka dështuar falë ndërhyrjes së shpejtë të sigurisë private.
Kamerat e sigurisë kanë kapur dy personat teksa ndodheshin pranë murit rrethues të pronës. Pasi kanë kuptuar se ishin zbuluar dhe se ishte aktivizuar alarmi, ata janë larguar menjëherë nga zona.
Në vendngjarje ka mbërritur policia katalanase, e cila ka nisur hetimet për tentativë grabitjeje. Aktualisht, autoritetet po analizojnë pamjet e kamerave të sigurisë për të identifikuar personat e përfshirë.
Vila luksoze ku jeton Yamal, e vlerësuar rreth 9.5 milionë paund, ka qenë më herët në pronësi të ish-futbollistit të Barcelonës, Gerard Piqué, dhe këngëtares Shakira.
Ky nuk është incidenti i parë që prek futbollistët e Barcelonës. Kohët e fundit, edhe disa lojtarë të tjerë të klubit janë përballur me raste vjedhjesh apo tentativash grabitjeje në banesat e tyre.
Ngjarja vjen në një periudhë kur Lamine Yamal po përjeton një moment të jashtëzakonshëm sportiv. Talenti spanjoll ishte një nga protagonistët e fitores ndaj Francës dhe tashmë përgatitet për finalen e Botërorit, ku synon të shkruajë historinë me kombëtaren e tij.
