Një tërmet i fuqishëm me magnitudë 7.8 ka goditur Turqinë jugore orët e para të kësaj të hëne, ku për pasojë më shumë se 500 njerëz janë vrarë. Të paktën 284 persona kanë vdekur dhe më shumë se 2 300 janë plagosur në Turqi, sipas nënpresidentit të vendit Fuat Oktay.
Ndërkohë në Siri, të paktën 237 njerëz u vranë dhe 639 u plagosën, njoftojnë mediat duke cituar një zyrtar të Ministrisë së Shëndetësisë. Numri i përgjithshëm i të vdekurve në Turqi dhe Siri tani është të paktën 521, shkruan CNN.
Tërmeti është një nga më të fortët që ka goditur Turqinë në më shumë se 100 vjet dhe shkaktoi lëkundje në të gjithë rajonin, duke shembur ndërtesa dhe duke i bërë banorët të vrapojnë në rrugë. Më shumë se 1 700 ndërtesa u dëmtuan në 10 qytete turke, tha zëvendëspresidenti turk.
“Unë kurrë nuk kam ndjerë diçka të tillë në 40 vitet që kam jetuar”, tha Erdem, një banor i qytetit turk të Gaziantep, pranë epiqendrës së tërmetit, i cili nuk pranoi të jepte mbiemrin e tij. “Ne u tronditëm të paktën tre herë shumë fort, si një foshnjë në krevat fëmijësh”. “Situata është shumë tragjike, dhjetëra ndërtesa janë shembur në qytetin e Salqin”, tha një anëtar i organizatës së shpëtimit Helmetat e Bardha në një videoklip në Twitter, duke iu referuar një qyteti rreth 5 km (3 milje) nga kufiri turk.
