Princi Harry ka planifikuar një tjetër udhëtim jashtë vendit, por nuk ka asnjë fjalë nëse Meghan Markle do ta shoqërojë atë. Duka i Sussex-it do të udhëtojë në Lesoto dhe Afrikën e Jugut në fillim të muajit të ardhshëm, pas vizitës së tij në Nju Jork këtë javë, ku ai gjithashtu shkoi vetëm. E gjithe kjo ka ndezur menjëherë spekulimet e një krize të mundshme në cift. Në Lesoto, Harry do të marrë pjesë në një takim me drejtues biznesi, filantropë dhe përfaqësues lokalë për të mbështetur punën e bamirësisë së tij për të rinjtë, Sentebale. Gjatë një pauze studimesh në vitin 2004, Princi Harry kaloi dy muaj në këtë mbretëri të vogël në Afrikën jugore dhe kjo përvojë e shënjoi thellë, pasi ishte vetëm 19 vjeç në atë kohë.
Në vitin 2006, i frymëzuar nga ai udhëtim dhe duke dashur të nderonte kujtimin e nënës së tij, Princeshës Diana, Princi Harry themeloi organizatën Sentebale (që do të thotë "mos më harro" në Sesoto) për të ndihmuar fëmijët e pafavorizuar. Vizita e tij e fundit në Lesoto ishte në vitin 2018, dhe ai tani do të kthehet për t'u takuar me Princin Seeiso, bashkëthemelues i organizatës, dhe udhëheqës lokalë dhe aktivistë të rinj. Grupi do të vizitojë programet e Sentebale në Lesoto për të vëzhguar ndikimin e tyre. Princi Seeiso tha: "Ne jemi të kënaqur të mirëpresim përsëri Princin Harry, të cilin e quajmë me dashuri "Mohale", emri i tij mbretëror Sesoto që do të thotë "luftëtar". Tani më shumë se kurrë, përballë sfidave me të cilat përballet rinia jonë në Lesoto, ne mbështesim energjinë kolektive të atyre që besojnë në potencialin e këtyre të rinjve, qofshin vendas apo ndërkombëtarë.”
E themeluar në vitin 2006, Sentebale filloi operacionet në Lesoto dhe më vonë u zgjerua në Botsvana. Organizata operon në katër fusha kryesore: përmirësimi i mirëqenies emocionale dhe sociale të njerëzve të prekur nga HIV, lehtësimi i aksesit në shërbimet shëndetësore dhe sociale, promovimi i aktivizmit të të rinjve dhe zhvillimi i aftësive dhe mjeteve të jetesës së tyre. Pas vizitës në Lesoto, Princi Harry dhe ekipi i tij do të shkojnë në Johanesburg, Afrika e Jugut, ku do të takohen me drejtues biznesi, fondacione dhe organizata të Afrikës së Jugut, aktive në mbështetjen e të rinjve. Qëllimi i këtyre sesioneve është zhvillimi i strategjive të përbashkëta për të kapërcyer ndarjen dixhitale dhe për të siguruar akses të rinjve në shëndetësi, arsim, sipërmarrje dhe mundësi punësimi.
