Gjithmonë e më shumë ndjekës po pyesin në rrjetet sociale nëse seriali hit i Netflix-it, Adolescence, është i bazuar në një histori të vërtetë. Në fakt, ndërsa historia e Jamie-t, konkretisht, nuk bazohet në një person apo ngjarje reale, ideja për serialin lindi nga disa raporte për të cilat bashkëkrijuesi Stephen Graham kishte dëgjuar në lajme, e që kishin të bënin me djem të rinj të përfshirë në krime me thikë kundër vajzave.
“Ishte një incident në të cilin, një adoleshent theri me thikë një vajzë,” tha Graham. "U trondita. Po mendoja: 'Çfarë po ndodh? Çfarë po ndodh në shoqërinë ku një djalë godet me thikë një vajzë për vdekje? Cfarë e nxit një dhunë të tillë?' Dhe më pas ndodhi përsëri, dhe ndodhi përsëri, dhe ndodhi përsëri. Unë me të vërtetë thjesht doja t'i hidhja dritë mbi të gjithë këtë situatë dhe të shtorja pyetjen: “Përse po ndodh kjo sot? Çfarë po ndodh kjo?'
Sipas Zyrës për Statistikat Kombëtare në Mbretërinë e Bashkuara, 83% e vrasjeve të adoleshentëve në 2023-2024 përfshinin armë të ftohta. Të miturit e moshës 10 deri në 17 vjeç ishin përgjegjës për rreth 17.3% të këtyre krimeve.
Së fundi, kryeministri britanik Keir Starmer u takua me krijuesit e serialit me katër episode, që trajton historinë e një djali të akuzuar për vrasjen e një shoqeje të klasës. Seriali ka ndezur një debat të gjerë mbi ndikimin e rrjeteve sociale te të rinjtë, shkruan Reuters.
Produksioni eksploron se si idetë e influencuerëve ‘online’, si i vetë-përshkruari mizogjinist Andreë Tate, mund të formësojnë qëndrimet e fëmijëve të varur nga telefonat inteligjentë dhe t’i shtyjnë ata drejt dhunës. Starmer shprehu mbështetjen e tij për vendimin e Netflix për ta bërë këtë serial “revolucionar” të transmetohet falas në shkollat e gjithë vendit.
“Si baba, duke parë këtë serial me djalin dhe vajzën time adoleshente, mund të them se pati një ndikim të madh tek unë,” deklaroi ai pas takimit me bashkë-skenaristin e “Adolescence” Jack Thorne, përfaqësues të organizatave bamirëse dhe të rinj në zyrën e tij në Downing Street.
