David Beckham ka shtuar një tjetër arritje të rëndësishme në karrierën e tij, pasi është nderuar me një yll në Hollywood Walk of Fame.
Ceremonia u mbajt të premten në Los Angeles, ku ish-kapiteni i Anglisë ishte i shoqëruar nga bashkëshortja e tij, Victoria Beckham, dhe tre nga fëmijët e tyre, Romeo, Cruz dhe Harper. Në mesin e të ftuarve të njohur ishin Tom Cruise, Eva Longoria, James Corden, si dhe ish-futbollisti amerikan Landon Donovan.
Victoria Beckham mbajti një fjalim emocionues, duke vlerësuar përkushtimin dhe këmbënguljen e bashkëshortit të saj ndër vite.
“Ai ka besuar gjithmonë se puna e palodhur dhe ëndrrat e mëdha mund të bëjnë gjithçka të mundur”, tha ajo.
I emocionuar nga ky vlerësim, Beckham u shpreh se nuk e kishte menduar kurrë se një ditë do të merrte një nderim të tillë.
“Kam qenë gjithmonë një ëndërrimtar, por kurrë nuk e kam imagjinuar se një futbollist anglez, i rritur në një familje të thjeshtë punëtore, do të nderohej në këtë mënyrë”, deklaroi ai.
51-vjeçari falënderoi familjen dhe të gjithë njerëzit që e kanë mbështetur gjatë rrugëtimit të tij, ndërsa fjalët më të ndjera ia kushtoi Victorias dhe fëmijëve të tyre.
“Victoria, bashkëshortja ime e jashtëzakonshme prej gati tre dekadash, pa të cilën asgjë nga kjo nuk do të ishte e mundur. Dhe fëmijët e mi të mrekullueshëm, që janë arsyeja pse zgjohem çdo ditë”, tha Beckham.
Në fund të fjalimit, ai ndau edhe një dëshirë personale:
“Shpresoj që një ditë fëmijët e mi të sjellin këtu nipërit dhe mbesat e mia dhe t’u tregojnë historinë e një djali që pati guximin të ëndërronte.”
Megjithatë, në këtë moment të rëndësishëm mungoi djali i madh i çiftit, Brooklyn Beckham, ndërsa mediat e huaja vijojnë të raportojnë për tensione të vazhdueshme brenda familjes.
