Kreu Stil Jetese

Bordo IN/ 5 elemente për të krijuar kombinimin më të bukur

6 Shkurt 2021, 11:19

Emocione floreale

E stilizuar përmes qëndismave të detajuara floreale, frymëzuar nga motivet e Mille Fleurs, kjo çantë ikonike e Christian Dior, edhe pse ka përmasa të bollshme, ka një prezencë tejet elegante, ideale për të kombinuar stilin urban dhe atë casual, për gratë që e duan të bukurën dhe guxojnë.

Efekti i artë

Ky fund nga Valentino është i përkryer për një festë ku ju doni me patjetër vëmendje. Prerja në formë V-je ju dhuron një pamje klasike, ndërsa efekti i artë, jep një dimension paksa luksoz, ndaj nëse doni të bini në sy, kombinojeni me këmishë të bardhë dhe këpucë me grimca të arta.

Military chic

Balmain u frymëzua nga stili tipik ushtarak duke krijuar një xhaketë me frymë tipike pariziene: e bardha vjen e kombinuar me shiritat e zinj prej sateni të cilët garantojnë një dekolte elegante, ndërsa butonat e mëdhenj ngjyrë ari, ju bëjnë të dukeni akoma më e fuqishme, një pamje e cila të imponon respekt.

Ujëvara e Chanel

Chanel sjell artin e lartë të përpunimit të arit të bardhë me diamante dhe perla nga ujërat e ëmbla, duke krijuar një karficë zbukurimi unike, që ngjan si një ujëvarë magjepsëse, e cila përmes madhështisë së saj, godet edhe më fort me logot e theksuara të markës prestigjioze franceze.

Stileto brokadë

Këto këpucë stileto janë të krijuara me dorë nga mjeshtri Manolo Blahnik, ku ai kombinon të artën dhe të zezën përmes figurinave brokadë, një stil tejet i rafinuar dhe me shije i realizuar përmes punimit të fijeve të imtësishme mbi lëkurë, duke krijuar një aksesor më mahnitës, nga taka deri tek maja.