Për të apasionuarit e modës kjo është periudha më e bukur e vitit, edhe pse Krishtindja është ende larg, ama është festë e modës, muaji i prezantimeve të koleksioneve dhe trendeve që do të drejtojnë stilin tonë në muajt në vijim.
Nëse edhe juve (njësoj si neve) ju mungon një biletë për në rreshtin e parë për të ndjekur nga afër sfilatat, ne kontaktuam një ndër grimieret më të njohura në Tiranë, Ela Pera për të na njohur me trendet e grimit.
Ela Pera tregon se këtë sezon fokusi kryesor janë sytë dhe përdorimi i ngjyrave të ndezura si mënyrë shprehje. Një eyeliner i theksuar në ngjyrat elektrike blu mbretëror, e kuqe apo e verdhë, do t’i japi portretit potencialin e duhur.
Grimierja e njohur këshillon që para çdo grimi, duhet t’i kushtohet rëndësia e duhur përgatitjes së lëkurës nëpërmjet produkteve hidratuese përshtatur sipas tipit të lëkurës. Një lëkurë me shkëlqim dhe e hidratuar është gjithmonë një bazë ideale për një grim perfekt.
Një tjetër trend make-up-i sipas Ela Pera është kombinimi i dy nuancave të kuqe dhe rozë tek mollëzat, për të krijuar një skuqje të trëndafiltë.
Ngjyrat vibrante nuk do të bëjnë përjashtim as tek buzët këtë sezon, dhe nëse bluja mund t’ju duket ide e guximshme, mendojeni sërish pasi duket se buzët nën intensitetin e ngjyrës së botës nënujore janë trendi i momentit. Sipas Peras nga ana tjetër nëse doni të notoni në ujëra të qeta, zgjidhni një ngjyrë neutrale si nude, camel apo kafe e lehtë.
