Teksa Botërori FIFA 2026 po zhvillohet si edicioni më i madh në histori, me 48 kombëtare, 104 ndeshje dhe organizim në tre shtete Shtetet e Bashkuara, Meksikë dhe Kanada, vëmendja nuk është përqendruar vetëm te futbolli. Ashtu si 20 vite më parë, moda dhe kultura e të famshmëve po bëhen pjesë e pandashme e spektaklit.
Në këtë kontekst është rikthyer në qendër të vëmendjes një nga paraqitjet më ikonike të Victoria Beckham gjatë Kupës së Botës 2006 në Gjermani, një turne që ndryshoi përgjithmonë marrëdhënien mes futbollit, modës dhe kulturës së personazheve të njohur.
Më 15 qershor 2006, gjatë ndeshjes Angli–Trinidad dhe Tobago në Nuremberg, David Beckham udhëhiqte kombëtaren angleze si kapiten, ndërsa në tribunë ishte bashkëshortja e tij, Victoria Beckham, e shoqëruar nga këngëtarja Cheryl Cole dhe djemtë e saj, Brooklyn dhe Romeo.
Veshja e Victoria Beckham u bë menjëherë një nga momentet më të komentuara të turneut. Ajo u shfaq me pantallona shumë të shkurtra xhins të bardha, çizme lëkure ngjyrë kafe në stil biker, një çantë të bardhë Hermès Birkin dhe një bluzë të ngushtë me mbishkrimin "England Rock$", të shoqëruar me flamurin anglez dhe ilustrimin e një bulldogu. Syzet e mëdha të diellit plotësonin një pamje tipike të modës Y2K.
Në dokumentarin e saj në Netflix, Victoria Beckham ka pranuar se sot e sheh atë stil me humor, duke treguar se në atë periudhë kërkonte të qëndronte në qendër të vëmendjes ndërsa kalonte nga karriera si anëtare e Spice Girls drejt ndërtimit të markës së saj të modës.
Botërori i vitit 2006 konsiderohet gjithashtu momenti kur lindi fenomeni i njohur si "WAGs" (Wives and Girlfriends), pasi mediat filluan të ndiqnin bashkëshortet dhe partneret e futbollistëve pothuajse me të njëjtin interes si vetë lojtarët.
Sot, me rikthimin e estetikës "blokecore", e frymëzuar nga kultura e futbollit të viteve '90 dhe 2000, stili i Victoria Beckham po konsiderohet sërish aktual. Kombinimi i fanellave të futbollit me xhinse, atlete retro, çanta luksoze dhe aksesorë të mëdhenj është kthyer në një nga tendencat më të forta të modës.
Edhe markat e njohura kanë përqafuar këtë frymë, duke prezantuar koleksione të frymëzuara nga Botërori FIFA 2026 dhe kombëtare si Brazili, Argjentina, Kanadaja dhe Spanja, duke dëshmuar se moda e tribunave vazhdon të jetë po aq e rëndësishme sa spektakli në fushën e lojës.
Galeria fotografike
