Nga Nada Biraçi
Çfarë ndjesie të jep atmosfera e festave?
Festat janë padyshim periudha ime e preferuar e vitit. Më duket se është koha e vitit kur të gjithë janë më të lumtur, atmosfera në qytet është e mbushur me gëzim dhe më pëlqen kur qyteti zbukurohet me drita kudo.
Cili është kujtimi më i bukur që ke nga festat e fundvitit? Çfarë kujtimesh ruan me nostalgji nga festimet kur ishe fëmijë?
Kam shumë kujtime të veçanta gjatë festave, por mendoj se më e veçanta për mua është kur isha e vogël dhe ende besoja te babagjyshi, sepse në lagjen ku u rrita, kishte shumë fëmijë dhe një vit babai i një shoqes time u vesh si Babagjyshi dhe erdhi për të sjellë dhurata në të gjitha shtëpitë. Duke qenë se isha fëmijë nuk e kisha idenë se ishte babai i Xhulias dhe në atë moment u ndjeva sikur po jetoja në një përrallë. Kam shumë kujtime të mrekullueshme gjatë fëmijërisë gjatë kohës së Krishtlindjes dhe disa nga traditat e mia të preferuara është kur dekorojmë pemën tonë të Krishtlindjes. Çdo vit blejmë një pemë të vërtetë, kështu që shkojmë ta zgjedhim pemën si familje dhe më pas e sjellim në shtëpi për ta zbukuruar me drita dhe zbukurime. Pasi pema është ngritur në shtëpi, duket sikur më në fund kanë ardhur festat sepse shtëpia mbushet me aromën e mahnitshme të pishës dhe jep një ndjesi të mrekullueshme. Unë jam e vetmja që gjithmonë dua ta vendos pemën sa më shpejt të jetë e mundur, më 1 dhjetor. Tradita e bërjes gjithmonë ëmbëlsira me mamin gjatë festave është shumë e ëmbël për mua, dhe ne veçanërisht bëjmë gjithmonë një tiramisu së bashku, sepse kjo është e preferuara për familjen time.
Çfarë ke planifikuar për Krishtlindje dhe Vitin e Ri? Në shoqërinë e kujt dhe ku do i kalosh festat?
Këtë vit po planifikoj t’i kaloj Krishtlindjet këtu në Shqipëri duke pasur parasysh që jam ende në Dance Albania dhe duke mos e ditur si do të shkojë eksperienca ime aty, vendosa të qëndroj në Shqipëri. Është hera e parë në jetën time që do ta kaloj Krishtlindjen larg familjes sime dhe jam pak e trishtuar sepse kjo është festa ime e preferuar dhe më pëlqen ndjesia e zgjimit në mëngjesin e Krishtlindjes dhe të qenurit të gjithë bashkë, por nga ana tjetër unë jam e lumtur që po e kaloj duke bërë diçka që më pëlqen, që është kërcimi dhe përjetimi i kësaj eksperience të mrekullueshme në Dance Albania. Sa i përket Vitit të Ri, do të jem në gjendje të kthehem në Kaliforni dhe mendoj se mund ta kaloj Vitin e Ri në Las Vegas me familjen time siç bëmë edhe një vit më parë.
Po dhurata? Të pëlqen të bësh apo të marrësh më shumë?
Më pëlqen shume të bëj dhurata. Më pëlqen procesi i të menduarit se çfarë do t’i pëlqejë dikujt dhe t’i dhuroj diçka që është kuptimplotë dhe të bëj të tjerët të lumtur. Për mua një dhuratë nuk duhet të jetë diçka për të cilën shpenzoni shumë para, por përkundrazi diçka që ka kuptim shpirtëror për personin që e merr atë. Në fakt të gjitha dhuratat e mia të preferuara kanë qenë më simbolike se çdo gjë. Këtë vit po krijoj një dhuratë shumë të veçantë për mbesën dhe nipin tim. Unë po i shkruaj secilit prej tyre një libër të shkurtër për fëmijë me një ilustrues qe të krijojë personazhet bazuar në to, kështu që do të jetë diçka e veçantë që ata do të kenë për gjithë jetën e tyre.
A ka një aromë me të cilën identifikon atmosferën e festave?
Mendoj se aromat që i lidh më së shumti me festat janë sigurisht aroma e pemës, pastaj aroma e kanellës dhe vanilja gjithashtu më kujton shumë Krishtlindjen.
Botuar në BORDO, Dhjetor-Janar 2023
