Filmi biografik "Michael", i cili rrëfen jetën e legjendës së muzikës Michael Jackson, është shndërruar në biografinë më fitimprurëse të të gjitha kohërave, duke arkëtuar 977 milionë dollarë në arkat botërore.
Me këtë sukses, filmi ka lënë pas edhe "Oppenheimer", i cili deri më tani mbante rekordin si filmi biografik me të ardhurat më të larta në histori. Njëkohësisht, "Michael" kishte kaluar më herët edhe "Bohemian Rhapsody", duke u bërë biografia muzikore më e suksesshme ndonjëherë.
I drejtuar nga regjisori Antoine Fuqua, filmi ndjek rrugëtimin e Michael Jackson nga vitet si fëmijë në grupin familjar The Jackson 5, deri te ngritja e tij si "Mbreti i Pop-it". Në rolin kryesor interpreton nipi i artistit, Jaafar Jackson, ndërsa prindërit e këngëtarit portretizohen nga Colman Domingo dhe Nia Long.
Që në javën e parë të shfaqjes, filmi arkëtoi 217 milionë dollarë në nivel global, duke kaluar biografi të njohura muzikore si Straight Outta Compton dhe Bohemian Rhapsody. Gjithashtu, ai është bërë filmi më fitimprurës në historinë e studios Lionsgate, duke lënë pas **The Hunger Games: Catching Fire>.
Megjithatë, suksesi komercial është shoqëruar edhe me polemika. Shumë kritikë e kanë cilësuar filmin si një portretizim të "pastruar" të jetës së Michael Jackson, pasi nuk trajton akuzat për abuzim seksual që kanë ndjekur artistin ndër vite. Disa recensues e kanë quajtur një "whitewash", ndërsa media të ndryshme kanë kritikuar shmangien e kësaj pjese të historisë së tij.
Pavarësisht kritikave, publiku e ka pritur shumë mirë filmin, duke i dhënë vlerësime dukshëm më të larta sesa kritikët në platformat e recensimit. Filmi është financuar nga pasuria e Michael Jackson dhe për skenat muzikore përdor vokalet origjinale të artistit.
Suksesi i "Michael" ka ndikuar edhe në rritjen e dëgjueshmërisë së muzikës së tij në platformat streaming. Gjatë muajit të fundit, Michael Jackson ishte artisti më i dëgjuar në YouTube në Mbretërinë e Bashkuar, me dyfishin e shikimeve krahasuar me rivalin më të afërt, Drake. Ndërkohë, hiti legjendar Billie Jean është aktualisht kënga më e dëgjuar në Spotify në nivel global, ndërsa Michael Jackson mbetet një nga artistët më të transmetuar në platformë edhe pas publikimit të filmit.
