Kina nisi një sondë për të mbledhur kampione nga pjesa e largët e Hënës. Kjo është sonda e parë që dërgohet për një mision të tillë në botë, teksa Pekini po avancon programin ambicioz që synon të dërgojë një mision me ekuipazh në Hënë deri më 2030. Një raketë që barte sondën hënore Chang'e-6 u lëshua nga Qendra e Hapësirës, Wenchang në provincën Hainan.
Uashingtoni ka paralajmëruar se programi i Kinës po përdoret si mbulesë për synime ushtarake dhe është një përpjekje e Pekinit për të pasur një dominim në hapësirë. Sonda Chang'e-6 synon të mbledhë rreth 2 kilogramë mostra hënore nga pjesa e largët e Hënës dhe t’i sjellë në Tokë për analizim. Media shtetërore, Xinhua, tha se ky është “misioni i parë i këtij lloji në historinë e eksplorimit të Hënës nga njeriu”. Ky mision, që teknikisht është i ndërlikuar, do të zgjasë për 53 ditë. Sonda do të tentojë të bëjë një nisje të paprecedent nga pjesa e Hënës që gjithmonë është kahen e kundërt me Tokën.
“I gjithë misioni është i mbushur me sfida të shumta”, tha për Xinhua zëvendësshefi i projektimit të këtij misioni, Wang Qiong. Sonda pritet të zbarojë në Pellgun Aitken në polin jugor, që është një prej kratereve më të mëdha të ndikimit në sistemin diellor. Kur të arrijë atje, sonda do të mbledhë dhe hënor dhe shkëmbinj dhe do të kryejë eksperimente të tjera në zonën e zbarkimit. Më pas sonda, me gjithë kampionet e marra do të niset nga Hëna për në Tokë.
