Ekspozimi i fëmijëve në rrjetet sociale është gjithmonë një temë shumë e diskutuar, për të cilën ka mendime pro dhe kundër. Ka nga ata prindër që në mënyrë kategorike nuk preferojnë të ndajnë me publikun portretet e fëmijëve të tyre, e ka të tjerë të cilët duket se e kanë të pamundur, t’i rezistojnë tundimit për të ndarë me botën krijesat e tyre.
Rudina Magjistari
Më 30 tetor të këtij viti, Mia mbush 9 vjeçe, e megjithatë publiku ende nuk e njeh portretin e vogëlushes së mami Rudinës. Me gjithë tundimin e madh për të ndarë me botën ‘luleqengjin’ e saj, moderatorja Magjistari është shprehur se arsyeja pse ka zgjedhur të mos e ekspozojë vajzën, është se sipas saj vëmendja e tepërt mund të ishte një peshë e tepërt, për të voglën Mia.
Olta Boka
Këngëtarja e njohur është shumë e vendosur, kur bëhet fjalë për ekspozimin e fëmijëve të saj në rrjete sociale. E rritur vetë që e vogël në botën mediatike, Olta është shprehur se ka dëshirë t’ia kursejë vajzës dhe djalit këtë eksperiencë, dhe vetëm nëse ata kur të rriten do të vendosin të jenë pjesë e medias, atëherë do të kenë gjithë mbështetjen e mamit. Olta Boka është nënë e një Gaias 4 vjeçe dhe e Brel 2-muajsh.
Xhemi Shehu
Dy djemtë e Xhemi Shehut, Martinin dhe Gabrielin, publiku i ka parë ‘me pikatore’. Moderatorja e “Portokallisë”, e cila njihet për natyrën hermetike sa i përket jetës së saj private, i ka postuar fëmijët në rrjetin social Instagram jo më shumë se 2-3 herë dhe siç ka pranuar edhe ajo vetë, më pas është penduar. Duket se Xhemi beson tek energjia e keqe dhe kjo është arsyeja, pse ka zgjedhur që fëmijët t’i mbajë larg vëmendjes mediatike.
Soni Malaj
Duket se ka qenë dëshira e babait të vajzës, i cili nuk ka dëshirë që ta përfshijë vajzën në thashetheme ‘yjesh’, vendim të cilin këngëtarja Soni Malaj e ka respektuar me rigorozitet. Ana sot është 12 vjeçe, e megjithatë portreti i saj nuk është ekspozuar asnjëherë për publikun.
Greta Koçi
Greta Koçi është bërë nënë 5 muaj më parë, e duket se këngëtarja ka zgjedhur që portreti i djalit të mos duket kurrkund në rrjete sociale. Artistja e njohur ka preferuar që jetën private ta mbajë gjithmonë larg kërshërisë së publikut, e me siguri do të duhet të kalojë shumë kohë, para se Greta të vendosë të ndajë detaje apo portrete të familjes së saj të vogël.
Eni Koçi
Ndryshe nga e motra, Eni duket se nuk është shumë supersticioze pasi Adea e saj e vogël,shfaqet shpesh në Instagramin e mamit. Fruti i dashurisë së këngëtares shqiptare me artistin nga Kosova, Genc Prelvukaj, është një vjeçe e gjysmë dhe ndjekësit e prindërve të saj të famshëm e shohin teksa ajo rritet dita-ditës.
Arbana Osmani
Duket se Arbana ka një rregull për formën e ekspozimit të fëmijëve të saj në rrjete sociale. Në vitin e parë të jetës të 3 fëmijëve të saj, moderatorja e njohur kujdeset të mos shfaqë asnjë pjesë të portretit të tyre, e më pas mami Arbana nis të bëhet më tolerante, duke ndarë me publikun e saj virtual në Instagram momente nga përditshmëria me Jonin, Diellin e Zoin.
Bieta Sulo
Me të përfunduar impenjimet e javës me programin “Ftesë në 5’”, moderatorja Bieta Sulo rend për te Kroi Art, udhëtimet e fundjavës me të cilin janë të shumta. Bieta ndan jo rrallë me publikun e saj virtual në Instagram, momente nga arratisjet e ditëve të pushimit me të birin, portretin e të cilit e ka publikuar që kur ishte bebe. Supersticioze ose jo, mami Bieta nuk i ka rezistuar dot tundimit për të prezantuar Kroin me publikun.
Vesa Luma
Aspak supersticioze, madje sapo djali Lian erdhi në jetë, mami Vesa hapi edhe një llogari në rrjetin social Instagram në emër të tij. Vogëlushi i prindërve të famshëm, Vesa Luma dhe Big Basta, tashmë është mësuar të jetë pjesë e rrjeteve sociale të mamit apo babit, e po ashtu edhe me vështrimet kurioze të njerëzve të panjohur në rrugë. Lian që tani është një VIP.
Einxhel Shkira
Fruti i një dashurie që lindi në ‘reality show’ “Big Brother”, ishte vetëm për disa muaj i panjohur për publikun, pasi tashmë Einxhëll Shkira dhe Dj Dagz na e kanë prezantuar vogëlushin e tyre Trev. Bebushi Trev është bërë shumë i njohur në Instagram dhe llogaria e tij personale në rrjetin social numëron mijëra ndjekës.
Galeria fotografike
Tre shenjat më të urryera të horoskopit!
Ç’duhet të dini para se të konsumoni shalqi?
Dieta e verës: Si të kthehemi në formë shpejt!
