Është një ndër firmat më të njohura në botë, fryma europiane e së cilës ka sjellë jo pak risi në këtë fushë. U sulmua së fundmi nga fansat për krijimin e veshjeve për Melania Trump, por kjo jo vetëm që nuk e dëmtoi aspak këtë emër, por nuk shqetësoi as dy stilistët që fshihen prapa kësaj perandorie. Edhe pse një event i përvitshëm, ‘Alta Moda show’ tërheq gjithmonë vëmendjen e çdokujt, ashtu sikurse ndodhi edhe këtë herë. Kjo fundjavë që lamë pas, e gjeti Dolce&Gabbana-n në Palermo të Siçilisë, pikërisht për këtë organizim. Duke i kushtuar një homazh ishullit, D&G solli një koleksion mahnitës, si kurrë më parë. Të gjithë adhuruesit e ngjyrës së arit, thjesht do të mbeten pa frymë kur të klikojnë në galeri, ashtu sikurse ata të cilët e dashurojnë shumëllojshmërinë e kolorit, nuk do të duan të shohin gjë tjetër përpos këtij koleksioni. Mes aksesorëve ekstravagantë për kokën e fustaneve të nusërisë me dizanje të stamposura, e famshmja Dolce&Gabbana sjell një tjetër këndvështrim mbi atë çka është më ‘in’. Në galeri do të gjeni momente të shkëputura nga prapaskenat dhe pasarelat. Marramendëse, apo jo?
