Qeveria australiane ka vendosur të forcojë më tej ligjin që ndalon përdorimin e rrjeteve sociale nga fëmijët nën 16 vjeç, duke parashikuar gjoba shumë më të larta për kompanitë teknologjike që nuk respektojnë rregullat.
Sipas ndryshimeve të reja, gjoba maksimale për shkelje të përsëritura rritet nga 49.5 milionë në 99 milionë dollarë australianë. Paralelisht, zgjerohen edhe kompetencat e Komisionerit të Sigurisë Elektronike, i cili do të ketë më shumë autoritet për të kërkuar të dhëna dhe prova nga platformat sociale, dyqanet e aplikacioneve dhe kompanitë që ofrojnë shërbime për verifikimin e moshës.
Aktualisht, autoritetet australiane po hetojnë nëse gjigantët e teknologjisë, si Meta (Facebook dhe Instagram), Google (YouTube), TikTok dhe Snap (Snapchat), po zbatojnë në mënyrë efektive këtë ligj.
Kryeministri Anthony Albanese ka kritikuar kompanitë e teknologjisë, duke deklaruar se ato nuk po bëjnë mjaftueshëm për të mbrojtur të miturit. Sipas tij, që nga hyrja në fuqi e ndalimit janë mbyllur ose kufizuar mbi 5 milionë llogari të përdoruesve nën moshën 16-vjeçare.
Megjithatë, studime të fundit tregojnë se një pjesë e madhe e adoleshentëve vazhdojnë të kenë akses në rrjetet sociale, duke anashkaluar sistemet e verifikimit të moshës përmes vetëdeklarimeve apo metodave të tjera, si identifikimi me selfie.
Një studim i publikuar në British Medical Journal zbulon se 85% e të rinjve australianë të moshës 12–15 vjeç vazhdojnë të përdorin rrjetet sociale, pavarësisht kufizimeve ligjore.
Ndërkohë, edhe Mbretëria e Bashkuar po shqyrton mundësinë e miratimit të masave të ngjashme, ndërsa vende të tjera po ndjekin me vëmendje modelin australian për shkak të shqetësimeve në rritje mbi ndikimin e rrjeteve sociale në shëndetin mendor të fëmijëve dhe adoleshentëve.
Në të njëjtën kohë, platforma Reddit ka nisur një proces gjyqësor në Gjykatën e Lartë të Australisë, duke kundërshtuar ligjin me argumentin se ai cenon lirinë e shprehjes. Nga ana tjetër, qeveria australiane ka bërë të ditur se do ta mbrojë vendimin e saj në gjykatë.
Edhe ministrja e Komunikimeve, Anika Wells, është shprehur se platformat teknologjike po bëjnë vetëm minimumin e nevojshëm për të shmangur ndëshkimet, duke theksuar se rregullatori do të ketë më shumë mjete për të hetuar praktikat e tyre dhe për të verifikuar pretendimet që ato paraqesin.
