Katy Perry dhe Orlando Bloom raportohet se i kanë dhënë fund lidhjes së tyre pas gati 8 vitesh. Sipas TMZ, Katy Perry dhe Orlando Bloom janë ndarë, duke i dhënë fund fejesës së tyre pas afro një dekade bashkë. Aktori i njohur i "Pirates of the Caribbean" thuhet se do të marrë pjesë në dasmën e Jeff Bezos dhe Lauren Sanchez në Venecia si “burrë beqar”, ndërsa Perry nuk pritet të jetë e pranishme, pasi ndodhet në mes të turneut të saj botëror.
Ndërsa në publik marrëdhënia e tyre dukej stabile – madje në maj, gjatë një koncerti në Las Vegas, Perry me humor e quajti veten “gruaja” e Bloom – burime për Us Weekly kanë zbuluar se çifti ka kaluar më shumë kohë të ndarë kohët e fundit dhe po përballen me probleme të vazhdueshme.
Thashethemet për ndarje u shtuan kur Bloom së fundmi u shfaq me “kafshën e tij mbështetëse emocionale”, duke deklaruar se ishte “shumë emocional”, gjë që nxiti spekulime për një ndarje të mundshme.
Perry dhe Bloom nisën lidhjen në vitin 2016, u ndanë në 2017 dhe u ribashkuan në 2018. Ata u fejuan në 2019 dhe në vitin 2020 mirëpritën vajzën e tyre, Daisy Dove Bloom. Deri tani, asnjëri prej tyre nuk ka komentuar publikisht për raportimet mbi ndarjen.
