Nihal Candan, një nga figurat më të njohura të rrjeteve sociale në Turqi, ka ndërruar jetë në moshën 30-vjeçare pas një beteje të gjatë dhe të dhimbshme me anoreksinë. Ajo u shua më 21 qershor 2025, pasi zemra i ndaloi në spital dhe përpjekjet e mjekëve për ta ringjallur nuk patën sukses. Në momentin e ndarjes nga jeta, Candan peshonte vetëm 23 kilogramë, pas një humbjeje dramatike në peshë prej afro 37 kilogramësh gjatë dy viteve të fundit.
E lindur më 15 qershor 1995 në Mersin të Turqisë, emri i saj i plotë ishte Gulnihal Candan. Nihal u bë e njohur për publikun në vitin 2014 përmes emisionit televiziv të modës “Bu Tarz Benim”, ku fitoi vëmendje për stilin e saj të veçantë dhe prezencën në ekran. Popullariteti i saj u rrit ndjeshëm edhe në rrjetet sociale, veçanërisht në Instagram, ku numëronte afro 900 mijë ndjekës. Përveç influencimit në fushat e modës dhe stilit të jetesës, ajo u angazhua edhe si sipërmarrëse me hapjen e “Nihal Candan Beauty Center”.
Megjithatë, jeta e saj mori një kthesë të errët në vitin 2023, kur ajo dhe motra e saj, Bahar Candan, u arrestuan me akuza për mashtrim dhe pastrim parash, të lidhura me një skemë të dyshuar për shitjen e paligjshme të makinave me çmime të ulëta. Gjatë qëndrimit në burg, gjendja e Nihal-it u përkeqësua ndjeshëm si në aspektin fizik, ashtu edhe në atë psikologjik, duke zhvilluar anoreksi nervore në formë të rëndë.
Për shkak të rrezikut serioz për jetën, ajo u lirua nga burgu në fillim të vitit 2025. Pavarësisht trajtimit dhe përpjekjeve të familjes për ta ndihmuar, gjendja e saj vazhdoi të përkeqësohej. Pak ditë para vdekjes, motra e saj Bahar bëri një thirrje publike, duke shprehur shqetësimin për gjendjen emocionale dhe fizike të Nihal-it, dhe kërkoi ndihmë për të shpëtuar jetën e saj.
Humbja e Nihal Candan ka tronditur ndjekësit dhe opinionin publik në Turqi, duke hapur edhe një debat më të gjerë për shëndetin mendor, presionin në rrjetet sociale dhe pasojat e burgimit në individë të brishtë emocionalisht.
-
Curios X elektrizon Eagle Beat Festival!
24 Qershor, 11:54
