Princi Harry më në fund ka thyer heshtjen në lidhje me aludimet që qarkullojnë për martesën e tij me Meghan Markle dhe këtë e bëri me zgjuarsinë dhe humorin e tij të pagabueshëm, duke dëshmuar edhe një herë se di t'i përgjigjet spekulimeve pa humbur kontrollin.
Duke folur në Samitin e DealBook 2024 të New York Times, Duka i Sussex-it pati mundësinë të trajtojë pyetjet e zjarrta në lidhje me jetën e tij private.
Gjatë intervistës me gazetarin Andrew Ross Sorkin, Princi Harry iu përgjigj lehtë, por me vendosmëri pyetjeve për veten e tij. Sorkin theksoi se mediat shpesh nuk mund të mos vëzhgojnë çdo lëvizje të çiftit, veçanërisht kur ata shfaqen të ndarë në ngjarje publike, si në rastin e galasë së fundit në Beverly Hills që Meghan mori pjesë pa bashkëshortin e saj.
Princi Harry hodhi poshtë thashethemet e ndarjes, duke bërë shaka se, sipas mediave, ai dhe Meghan Markle tashmë janë "divorcuar 10, 12 herë. Është e vështirë të vazhdosh me këtë spekulim. Kjo është arsyeja pse unë i injoroj”, tha princi.
Harry ka konfirmuar se nuk ka ndërmend të largohet nga Kalifornia. “Jemi të lumtur këtu”, shtoi ai. Duka theksoi se synimi i tij kryesor mbetet të jetë një bashkëshort dhe baba i mirë: “Të jesh bashkëshorti dhe babai më i mirë që mund të jem është motoja që drejton jetën time familjare”.
Pavarësisht spekulimeve, Sussex-ët vazhdojnë të jetojnë jetën e tyre larg vëmendjes, por me një gjë shumë të qartë: lidhja e tyre mbetet e fortë, pavarësisht gjithçkaje.
