Mbrëmjen e së hënës Eneda Tarifa deklaroi publikisht në një postim në Instagram se ajo nuk do të ishte më pjesë e jurisë së talent show-t “The Voice Kids” që transmetohet në Top Channel. Menjëherë pas kësaj deklarate nisën edhe hamendësimet se kush mund të ishte artisti apo artistja që do të ulje në karrigen e Tarifës këtë edicion të ri.
Sipas Anabel.al, në panelin e jurisë së “The Voice Kids”, në vend të këngëtares Eneda Tarifa mësohet se do të artistja e re Arilena Ara.
Emri i Arilenës në fakt duket disi surprizë dhe i papritur duke qenë se 20 vjeçarja shkodrane është vetë produkt i një talent show muzike, transmetuar në televizionin konkurrent Tv Klan.
Jo vetëm kaq por Arilena duke qenë ‘produkt’ i Klanit dhe i spektakleve atje, tingëllon disi e papritur që të shfaqet në Top Channel, ku duhet thënë nuk është shfaqur ndonëjeherë më parë.
Gjithsesi mbetet për t’u parë reagimi i produksionit për të konfirmuar ose jo këto zëra, ndërsa çfarë dihet deri më tani janë emrat e anëtarëve të tjerë të jurisë që kanë mbetur të pandryshuar: Miriam Cani, Aleksandër dhe Renis Gjoka.
“The Voice Kids” pritet të nisë transmetimin në janar të vitit të ardhshëm ndërsa është konfirmuar largimi nga prezantimi i spektaklit i prezantuesit historik të këtij formati Ledion Liço, vendin e të cilit e zë prezantuesja Dojna Mema.
