Sinodi i Shenjtë i Kishës Ortodokse ka zgjedhur Kryepeshkopin e ri. Anastas Janullatos do të pasohet nga Joan Pelushi, Mitropoliti i Korçës. Qindra besimtarë e pritën me duartrokitje Kryebariun e tyre shqiptar duke e brohoritur si të denjë. Ceremonia e fronëzimit, do të mbahet pas dy javësh, më 29 mars.
Sinodi i Shenjtë me votim unanim e caktoi 69-vjeçarin si pasues të Anastas Janullatos.
Kush është Joan Pelushi...
Imzot Joan Pelushi, i cili u zgjodh Kryepeshkop i Tiranës, Durrësit dhe gjithë Shqipërisë më 16 mars 2025. Kleriku patriot ka dhënë një kontribut të madh në Kishën Ortodokse Autoqefale të Shqipërisë.
Ai është njohur për fjalën e tij "Kush do Zotin do Atdheu", e cila u tha gjatë Meshës së Flamurit më 28 Nëntor, një traditë e nisur nga Fan Noli në 1920 në Kishën e Shen Gjergjit në Korçë.
Lindur në Tiranë më 2 janar 1956, në rininë e tij, gjatë periudhës së persekutimit fetar, ai u pagëzua fshehurazi nga prifti Kozma Qirio. Pas studimeve për teologji në Holy Cross Greek Orthodox School of Theology në Boston, SHBA, ai u kthye në Shqipëri në vitin 1992 për të kontribuar në rindërtimin e Kishës Ortodokse Autoqefale.
Në vitin 1994, u dorëzua dhjakon dhe më pas prift, duke vijuar mësimdhënien në Akademinë Teologjike të Kishës Ortodokse Autoqefale të Shqipërisë. Në vitin 1998, ai u bë Mitropolit i Korçës, ku ka kontribuar jo vetëm në shërbimin kishtar, por edhe në zhvillimin e terminologjisë filozofiko-fetare të shqipes me përkthime dhe botime të rëndësishme.
Për kontributin e tij të jashtëzakonshëm, ai është nderuar me tituj si "Qytetar Nderi i Korçës" dhe "Doctor Honoris Causa" nga Universiteti “Fan S. Noli”.



















