Nga Nada Biraçi
Një histori dashurie, që nisi në oborrin e gjimnazit “Aleksandër Moisiu” në qytetin e Kavajës, do të rrëfehet për “Bordo” nga dy protagonistët, Andi dhe Ornela Lila. Ai ishte maturanti që sapo kishte nisur të futej në botën e futbollit, ndërsa ajo flokarta simpatike e vitit të parë. Asnjërit prej tyre s'do t'ia merrte mendja se në atë oborr shkolle ku zhurmonin qindra zëra moshatarësh, sytë e tyre do të ndesheshin për herë të parë një mëngjes shtatori e në ditët që pasonin njëra-tjetrën, Andi ishte i mezipritur çdo mëngjes që flokët e arta të Ornelës t'ia behnin në derën e shkollës. “Për mua ishte dashuri me shikim të parë, u godita sapo e pashë në gjimnazin ku kisha kaluar 3 vite dhe asnjëherë nuk më kishte goditur shikimi i një vajze aq fort e njëkohësisht aq ëmbël”, kujton me nostalgji ish-futbollisti i Kombëtares Andi Lila. Dashuria e tyre sot është 21 vjeçe e ndonëse bashkërrugëtimi i çiftit ka shkelur edhe në terrene ndonjëherë jo fort të sigurta, sipas Andit nuk ka stuhi që një dashuri si e tyrja nuk e zbut.
Andi, si e kujton takimin e parë me Ornelën? Çfarë kishte ajo që të bëri të mendoje se ishte e duhura?
Ishte viti 2004 kur të dy ne ishim nxënës në gjimnazin “Aleksandër Moisiu” në Kavajë. Unë isha në vitin e katërt, ndërsa Ornela sapo kishte ardhur në vit të parë. Më goditi sapo e pashë të futej në oborrin e shkollës. Një vajzë e bukur, me flokët biondë, më bëri të dashurohesha me shikim të parë. Periudha e parë e njohjes, joshjes nga pamja e jashtme, por koha është faktori kryesor që të njohësh dhe të dashurohesh me njeriun e duhur dhe të kuptosh që është shpirti binjak, ajo është e veçantë në çdo drejtim për mua.
Çdo marrëdhënie kalon në kriza momentale ose jo. Në çiftin tuaj, kush dhe çfarë ju ka ndihmuar t'i kaloni?
Pa diskutim kemi patur uljet dhe ngritjet tona, por dashuria për njëri-tjetrin ka qenë gjithmonë më e fortë se gjithçka tjetër.
Bëni ju arratisje të ëmbla? Ku preferoni të shkoni kur doni të qëndroni vetëm nën shoqërinë e njëri-tjetrit?
Ne bëjmë arratisje te ëmbla shpesh, por vendndodhjet janë sekrete, kemi bërë një pakt kohët e fundit që arratisjet të jenë më të shpeshta.
Nëse historia juaj e dashurisë do të ishte një libër, si do të titullohej? Po kopertina e këtij libri si do të ishte?
Një dashuri, një jetë! Kopertina e librit paraqet një atmosferë romantike dhe të ndjeshme me dy fëmijët pranë nesh.
Ardhja e fëmijëve, si e ka ndryshuar romancën tuaj?
Ardhja e fëmijëve ka qenë si një bekim, që ka forcuar themelet e marrëdhënies sonë. Ajo ka sjellë një dimension të ri dashurie, përgjegjësie dhe kuptimi të përbashkët, duke na afruar edhe më shumë në çdo hap të jetës. Prania e fëmijëve ka përforcuar lidhjen tonë, duke na bërë jo vetëm partnerë në dashuri, por edhe bashkudhëtarë në prindërim. Çdo buzëqeshje dhe përqafim i fëmijëve është si një kujtesë e bukurisë së dashurisë sonë, e cila tani jeton në një formë edhe më të fuqishme dhe të prekshme.
Futbollistët janë gjithmonë të mikluar nga vajzat e bukura. Nisur nga ky fakt ka patur vend për xhelozi në marrëdhënien tuaj?
Është e kuptueshme që, duke qenë futbollistë shpesh të rrethuar nga vëmendja e vajzave të bukura, situata të tilla mund të nxisin ndonjëherë momente xhelozie në një marrëdhënie. Megjithatë, këto momente mund të jenë gjithashtu një provë për forcën dhe besimin e ndërsjellë midis çiftit. Nëse marrëdhënia mbështetet te një komunikim i hapur dhe te një ndjenjë e fortë respekti dhe sigurie, çdo xhelozi kthehet në një mundësi për të kuptuar dhe përforcuar më tej lidhjen. Në fund të fundit, besimi është çelësi që e mban të pathyeshme një marrëdhënie, pavarësisht sfidave apo ndikimeve të jashtme.
Si e quani njëri-tjetrin me përkëdheli?
Emrat përkëdhelës që përdorim janë një pjesë intime e marrëdhënies sonë, diçka që kemi zgjedhur ta mbajmë vetëm për ne. Janë si një sekret i vogël, që i jep më shumë magji lidhjes sonë.
Cili prej jush është më romantiku?
Të dy jemi shumë romantikë!
Dhurata dhe surprizat ekskluzivitet i kujt janë?
Sektorin e dhuratave dhe surprizave e mbuloj unë me shumë krenari.
Mund të ndani me ne një surprizë që do ta veçonit si më të bukurën?
Ne besojmë se dashuria nuk ka nevojë për një ditë të caktuar, për ne çdo ditë ka vlerën e vet për të treguar kujdesin dhe vëmendjen ndaj njëri-tjetrit.
Nëse do t'ju pyesnim për recetën e një marrëdhënie të gjatë, cila do të ishte?
Dashuria, respekti, komunikimi dhe durimi janë përbërësit kryesorë. Dhe mbi të gjitha, të mos harrosh pse u dashuruat që në fillim.
