Politikania e njohur e të djathtës shqiptare Jozefina Topalli ka folur pasditen e sotme te “Rudina” për karrierën, familjen dhe pasionet e saj. Diku nga fundi i bisedës Topalli ndau me publikun që e ndiqte një moment shumë të vështirë të jetës së saj familjare të cilin siç u shpreh e ka përjetuar shumë keq.
Kur u ndal të fliste për familjen, Topalli tregoi se e ëma e saj, e cila asokohe jetonte në shtëpinë e vjetër 100 vjeçare në Shkodër, dy vite më parë ka qenë në gjendje të rëndë shëndetësore, gati-gati në fund të jetës. “Ka qenë një moment shumë i vështirë për mua. Para dy vjetësh mamaja ime ishte në fund të jetës, unë e mora siç ishte me autoambulancë dhe e solla në Tiranë te apartamenti im”- rrëfeu me sy të përlotur ish-kryetarja e Kuvendit të Shqipërisë.
Në ekran u shfaqën disa foto nënë e bijë ku dukej e ëma e politikanes e ulur në një karrocë me rrota. “Asaj akoma nuk i pëlqen këtu (në Tiranë) pasi është mësuar në shtëpinë e saj të vjetër e me dhoma të mëdha, por unë jam e qetë dhe e lumtur që e kam pranë”– u shpreh Jozefina Topalli.
