Pas ngjitjes së mbretit Charles III në fron pas vdekjes së nënës së tij Mbretëresha Elizabeth II, gruaja e tij Camilla, dikur Dukesha e Cornwall-it, tani do të njihet si Queen Consort, bashkëshortja e Mbretit.
Tradita e mëparshme mbretërore diktonte që titulli t’i jepej gruas së mbretit, por divorci i Charles nga Princesha Diana në 1996 e ndërlikoi çështjen.
Në kohën e ndarjes së tyre, Kisha e Anglisë e kundërshtoi me forcë divorcin. Admirimi publik për Dianën ishte (dhe mbetet) i fortë, duke bërë që shumë njerëz të mendojnë se Camilla nuk duhet ta kishte marrë titullin për respekt për Dianën.
Por, Mbretëresha konfirmoi titullin e Camilla-s në shkurt, në prag të 70-vjetorit të mbretërimit të saj. Në një deklaratë, Mbretëresha Elizabeth II njoftoi se ishte “dëshira e saj më e sinqertë që, kur të vijë koha, Camilla të njihet si Queen Consort ndërsa vazhdon shërbimin e saj besnik”.
Ishte hera e parë që Mbretëresha e kishte pranuar rolin e Camilla-s në monarki në këtë mënyrë. “Ne jemi thellësisht të ndërgjegjshëm për nderin që përfaqëson dëshira e nënës sime”, tha Charles, në përgjigje të deklaratës së nënës së tij në shkurt. “Ndërsa ne kemi kërkuar së bashku t’i shërbejmë dhe të mbështesim Madhërinë e saj dhe njerëzit e komuniteteve tona, gruaja ime e dashur ka qenë mbështetja ime e palëkundur gjatë gjithë kohës”.
Camilla do të marrë titullin e Mbretëreshës Consort, që tregon se ajo është bashkëshortja e një mbreti, në vend të titullit të mbretëreshës, sepse anëtarët që martohen në familjen mbretërore nuk mund të trashëgojnë fronin.
Camilla dhe Charles u përballën me kritika për vite me radhë pasi lidhja e tyre u konfirmua në shtyp. Diana, e cila vdiq në 1997, ishte e dashur globalisht dhe ajo fajësoi Camilla për martesën e saj të dështuar. Disa besonin se kjo do ta pengonte Camilla që të martohej ndonjëherë me Charles, e lëre më të quhej Mbretëreshë. Pas martesës së tyre në vitin 2005, Camilla nuk mori titullin e Dianës si Princesha e Uellsit, në vend të kësaj zgjodhi Dukeshën e Cornwall.
Dhe pavarësisht një opinioni shumë të përmirësuar publik për Camilla-n në 25 vitet që nga vdekja e Dianës, ka ende shumë debate nëse ajo meriton të marrë titullin.
Galeria fotografike
