Të paktën 64 persona kanë humbur jetën në përmbytjet më vdekjeprurëse që kanë goditur Spanjën për tre dekada. Shiu i rrëmbyeshëm goditi rajonin lindor të Valencias të martën, duke lënë rrugë dhe qytete nën ujë, thanë autoritetet lokale të mërkurën.
Disa pjesë të rajonit të Valencias janë pa energji me linjat telefonike gjithashtu të ndërprera. Punonjësit e shërbimeve të urgjencës po përdorin dronë për të kërkuar të zhdukurit. Mediat lokale raportuan se dhjetëra njerëz në Valencia e kaluan natën të bllokuar në kamionë ose makina, si dhe në çati dhe ura, duke pritur për t’u shpëtuar.
"Nëse (shërbimet e urgjencës) nuk kanë mbërritur, nuk është për shkak të mungesës së mjeteve apo predispozicionit", tha Mazon në një konferencë për shtyp, duke shtuar se arritja në zona të caktuara ishte "absolutisht e pamundur".
Të paktën 62 persona vdiqën në Valencia, ndërsa autoritetet në rajonin qendror të Castilla La Mancha thanë se stuhia kishte lënë dy të vdekur dhe disa të zhdukur. Dhjetra video të shpërndara në mediat sociale gjatë natës dukej se tregonin njerëz të bllokuar nga ujërat e përmbytjeve, me disa që ngjiteshin në pemë për të mos u rrëmbyer.
Trenat për në qytetet e Madridit dhe Barcelonës u anuluan për shkak të përmbytjeve dhe shkollat dhe shërbimet e tjera u pezulluan në zonat më të goditura, thanë zyrtarët.
Shërbimet e urgjencës në rajon u kërkuan qytetarëve të shmangin të gjitha udhëtimet rrugore dhe të ndiqnin këshillat e mëtejshme zyrtare, dhe një njësi ushtarake e specializuar në operacionet e shpëtimit u vendos në disa vende për të ndihmuar punonjësit e urgjencës lokale.
