Butrint Imeri ka hapur dyert e shtëpisë së tij për një intervistë ndryshe në “Andale”, me gazetaren Keisiana, ku foli jo vetëm për projektet muzikore, por edhe për jetën personale, dashurinë dhe gjërat që sot i sheh me më shumë maturi.
Një nga momentet më të veçanta të kësaj interviste ishte ndarja e çmimit të madh prej 100 mijë eurosh, i cili shkoi për çiftin Bleoni dhe Laurita. Ata u shpallën fitues pas një sfide në TikTok, ku fansat duhej të postonin video me një nga këngët e albumit të ri të artistit, “I pari”. Videoja që mori më shumë pëlqime fitoi shpërblimin.
Butrinti tregoi se kjo ide nuk ishte e rastësishme, por një mendim i përbashkët mes tij dhe stafit. Sipas tij, pas gjithë mbështetjes që ka marrë ndër vite nga publiku, kishte ardhur momenti që ai t’u kthente diçka mbrapsht atyre që e kanë ndjekur dhe përkrahur.
Por përtej atmosferës festive, intervista mori një drejtim më personal kur këngëtari u pyet për dashurinë. Ai u shpreh se dashuria e vërtetë, sipas tij, duhet të jetë e pastër, e bazuar në respekt, mirëkuptim dhe vlerësim të ndërsjellë mes dy njerëzve.
Megjithatë, Butrinti pranoi se fama dhe profesioni i tij nuk e bëjnë aspak të lehtë ndërtimin e një marrëdhënieje të qetë. Koncertet, oraret e vona dhe puna e vazhdueshme me njerëz shpesh mund të krijojnë keqkuptime apo pengesa në jetën private.
Kur u pyet se çfarë e tërheq më shumë te një vajzë, artisti veçoi “aurën”, por sidomos sytë. Për të, sytë kanë një rëndësi të veçantë, pasi sipas tij një vajzë mund të flasë shumë edhe pa thënë asnjë fjalë.
Gjatë rrëfimit, ai nuk shmangu as gabimet e së kaluarës. I pyetur për diçka që ka bërë në dashuri dhe nuk do ta përsëriste më, Butrinti tha se ka humbur shumë kohë me një person të gabuar. Ai shtoi se kur një raport merr fund, kjo për të është një shenjë se ajo histori nuk ka vlejtur ashtu siç është menduar dikur.
Këto eksperienca duket se e kanë bërë më të kujdesshëm në mënyrën se si i sheh marrëdhëniet. Nëse më parë vendimet i merrte më shumë me zemër, sot ai thotë se udhëhiqet nga logjika, duke e vendosur besimin dhe respektin në qendër të çdo lidhjeje.
Një nga momentet më pikante të intervistës ishte kur Butrinti u pyet se deri ku do të shkonte për dashurinë. Ai pranoi se për një ndjenjë të vërtetë do të ishte i gatshëm të hiqte dorë nga diçka shumë e bukur që e pëlqen. Por kur u pyet nëse kjo mund të ishte muzika, artisti e bëri të qartë se aty ka një kufi: nga muzika nuk do të hiqte dorë kurrë.
