Reperi italian Fedez, emri i vërtetë i të cilit është Federico Leonardo Lucia, është shtruar mbrëmjen e kaluar në spitalin Fatebenefratelli në Milano, pasi ka shfaqur probleme gastrointestinale.
Artisti mbërriti me ambulancë pak para orës 22:00, pasi ishte ankuar për shqetësime në stomak, të cilat dyshohet se mund të jenë shkaktuar nga përdorimi i ilaçeve anti-inflamatore.
Sipas burimeve shëndetësore, gjendja e tij nuk paraqitet serioze. Megjithatë, duke marrë parasysh historikun shëndetësor të reperit, mjekët vendosën ta mbanin nën kontroll dhe t’i kryenin një sërë ekzaminimesh. Rezultatet e analizave priten të përcaktojnë shkakun dhe shkallën e problemit.
Fedez është përballur edhe më parë me komplikacione të rënda shëndetësore. Në vitin 2023, ai iu nënshtrua një ndërhyrjeje urgjente për shkak të një hemorragjie të brendshme të shkaktuar nga ulcera. Rreth një vit e gjysmë më herët, reperi kishte kryer një operacion për heqjen e një tumori në pankreas.
Edhe gjatë vitit 2024, Fedez u shtrua në Poliklinikën e Milanos për një tjetër episod hemorragjie të brendshme, pasi një problem i dyshuar shëndetësor e kishte detyruar të anulonte një angazhim televiziv.
Shtrimi i fundit në spital vjen vetëm pak ditë pas lindjes së fëmijës së tij të tretë, Edoardo Lupo, nga marrëdhënia me partneren Giulia Honegger.
Ndërkohë, reperi po përgatitej për koncertin e tij të planifikuar më 25 shtator në Unipol Forum, në Assago. Deri më tani nuk është bërë e ditur nëse gjendja shëndetësore do të ndikojë në angazhimet e tij të ardhshme.
