Khloé Kardashian ka zbuluar aromën e saj më të re, “XO Blue”, e cila do të jetë e disponueshme në treg duke nisur nga 14 qershori. Ky produkt shënon parfumin e tretë në koleksionin personal të yllit të reality show-ve, pas “XO Khloé” dhe “Almost Always”.
Sipërmarrësja 41-vjeçare e përshkruan aromën e re si një “arratisje në një shishe”, të frymëzuar nga atmosfera verore, plazhet tropikale dhe ndjesia e lirisë.
“Doja të krijoja një aromë që të të transportojë në një plazh me ujëra të kristalta dhe të të sjellë ndjesinë e verës gjatë gjithë vitit”, është shprehur ajo.
“XO Blue” kombinon nota të lychee, kokosit, magnolias, bergamotit dhe drurëve aromatikë, duke krijuar një aromë të freskët, por më intensive dhe më të guximshme krahasuar me krijimet e saj të mëparshme.
Sipas Khloé-s, parfumi i ri i jep asaj më shumë vetëbesim dhe e bën të ndihet më sensuale.
“Kur e përdor këtë aromë, ndihem si versioni më i mirë i vetes sime. Më bën të ndihem më seksi dhe më e sigurt”, tha ajo.
Kardashian zbuloi gjithashtu se krijimi i parfumeve ka qenë një proces sfidues, por pritja pozitive që kanë marrë aromat e saj të mëparshme e ka inkurajuar të vazhdojë të zgjerojë praninë e saj në industrinë e bukurisë.
Ajo shtoi se një nga momentet që e emocionojnë më shumë është kur fëmijët e saj shohin produktet e saj nëpër dyqane dhe ndihen krenarë për sukseset e nënës së tyre.
