Këngëtarja legjendare Angie Stone është ndarë nga jeta në moshën 63-vjeçare. Lajmin për vdekjen e saj e ka bërë të ditur vajza e saj, Diamond Stone, e njohur edhe si Ladi Diamond, përmes rrjetit social Facebook të shtunën.
“Mamaja ime ka ndërruar jetë”, ka shkruar 41-vjeçarja, duke e shoqëruar mesazhin e saj me emoji të përlotur. Sipas zëdhënëses së saj, Deborah R. Saban, Angie Stone, një anëtare e grupit hip-hop “The Sequence”, sapo kishte njoftuar një koncert në Montgomery, Alabama, kur u përfshi në një aksident me makinë dhe u vra në orët e para të mëngjesit të së shtunës.
Deborah Saban tha për TMZ se vdekja e saj e papritur ka zhytur në pikëllim familjen dhe miqtë e saj. Angie Stone kishte një vajzë, Diamond, me ish-bashkëshortin e saj, Rodney Stone dhe një djalë, 27-vjeçarin Michael Archer, nga lidhja e saj me D’Angelo. Përfaqësuesit e këngëtares nuk kanë komentuar për Page Six.
Pak para vdekjes së saj, Angie Stone kishte promovuar koncertet e saj të ardhshme në Alabama, më 28 shkurt dhe në Baltimore, më 1 mars, përmes Instagramit. “Ne jemi duke rezervuar turne dhe ka shumë gjëra që nuk dua t’i zbuloj ende, por ju mund të shihni buzëqeshjen e madhe në fytyrën time,” tha ajo në një video që postoi.
Ajo kishte treguar se planet e saj përfshinin projekte televizive dhe filmike, turne dhe bashkëpunime me artistë të tjerë. “Po kthehemi fuqishëm”, kishte deklaruar ajo.
Angie Stone e filloi karrierën e saj në 1979 si anëtare e grupit femëror me tre pjesë “The Sequence”, së bashku me Cheryl Cook dhe Gwendolyn Chissom. Grupi nënshkroi me Sugar Hill Records dhe lëshoi disa albume nga 1979 deri në 1985.
Në vitet 1990, Angie Stone filloi një karrierë solo, duke nxjerrë albumin “Black Diamond” në 1999. Më pas ajo u zgjerua në film, duke marrë pjesë në komedinë “The Hot Chick” në 2002 dhe në filmin “Ride Along” në 2014.
