Telefonat inteligjentë janë kthyer në një pjesë të pandashme të përditshmërisë. Nga komunikimi dhe pagesat online, deri te ndjekja e videove apo lundrimi për orë të tëra në rrjetet sociale, përdorimi i tyre po ushtron gjithnjë e më shumë presion mbi duart dhe kyçet.
Mjekët paralajmërojnë se lëvizjet e përsëritura gjatë shkrimit dhe lëvizjes në ekran mund të shkaktojnë atë që njihet si “gishti i mesazheve”. Ky term përfshin një sërë shqetësimesh, si ngurtësim të gishtit të madh, dhimbje pranë nyjës, pulsime apo kërcitje gjatë përkuljes së tij.
Në rast se simptomat neglizhohen, ngarkesa e vazhdueshme mund të lidhet me probleme më serioze, si sindroma e tunelit karpal, inflamacioni i tendinave apo përkeqësimi i artritit ekzistues.
“Duart tona nuk janë krijuar për të përdorur telefonin gjatë gjithë ditës. Duhet të tregojmë më shumë kujdes ndaj tyre”, shpjegon Eugene Tsai, kirurg në Cedars-Sinai Orthopaedics and Sports Medicine.
Telefonat e sotëm janë më të mëdhenj dhe më të rëndë se modelet e mëparshme. Krahas ndryshimit të përmasave, është rritur ndjeshëm edhe koha që njerëzit kalojnë përpara ekranit.
Shqetësimet e lidhura me përdorimin e telefonit nuk janë të reja. Dy dekada më parë flitej për të ashtuquajturin “gishti BlackBerry”, por përdorimi masiv i pajisjeve inteligjente i ka bërë dëmtimet nga mbingarkesa shumë më të zakonshme.
Mbajtja e kyçit dhe bërrylit në të njëjtin pozicion për një kohë të gjatë mund të shkaktojë dhimbje në bazën e gishtit të madh dhe në kyç. Edhe mbajtja e telefonit në pozicion vertikal për orë të tëra ushtron presion mbi gishtat e tjerë.
Zgjidhja më e thjeshtë është reduktimi i kohës para ekranit dhe kryerja e pushimeve të shkurtra mes periudhave të përdorimit.
Nëse kufizimi i telefonit duket i vështirë, ekspertët këshillojnë të ndërroni dorën me të cilën e mbani pajisjen, të përdorni gishtin tregues në vend të gishtit të madh dhe të ndryshoni vazhdimisht pozicionin.
Mund të shfrytëzohen gjithashtu funksionet e komandimit me zë dhe shndërrimit të zërit në tekst, të cilat reduktojnë nevojën për të shkruar. Zmadhimi i shkronjave mund të ndihmojë që telefoni të mos mbahet shumë pranë fytyrës, ndërsa aksesorët mbajtës në formë unaze e shpërndajnë më mirë peshën e pajisjes në dorë.
Disa ushtrime të përditshme mund të lehtësojnë tensionin pas përdorimit të zgjatur të telefonit. Ekspertët rekomandojnë përkuljen e kyçit përpara dhe mbrapa, duke përdorur dorën tjetër për të ushtruar një rezistencë të lehtë.
Lëvizja e gishtit të madh në formë rrethore dhe përkulja e secilit gisht veçmas mund të ndihmojnë gjithashtu. Për dhimbjet në bazën e gishtit të madh, dora mund të vendoset mbi një sipërfaqe të sheshtë, ndërsa gishti largohet butësisht nga gishtat e tjerë dhe mbahet në atë pozicion për rreth 30 sekonda.
Nëse dhimbja, mpirja apo ndjesia e shpimit vazhdon edhe pas reduktimit të kohës para ekranit, pushimit dhe përdorimit të akullit, rekomandohet konsultimi me një mjek.
Një pushim i shkurtër dhe ndryshimi i pozicionit mund të duken si masa të parëndësishme, por të zbatuara rregullisht mund të bëjnë një ndryshim të madh për shëndetin e duarve.
Vera, shumë pushime, në pak ditë
Chapter X / Një histori e shënuar për 10 vjet
Koha për të dalë nga qyteti!
Me pamje nga ballkoni
