Gjithçka nisi me javën e modës në New York, për të vijuar më tej me Milanon, ndërsa Parisi ishte qershia mbi tortë, si çdo herë tjetër. Dizanjerët më në zë të momentit prezantuan krijimet e tyre për Panver/Verë 2018, duke bërë kështu që të gjithë të apasionuarit pas modës të kthenin kokën nga kryeqyteti francez. Por, çfarë mësuam nga sfilatat pariziene deri më tani?
Saint Laurent, favorizues i shpatullave të zbuluara dhe modeleve të fryra!
Koleksioni i përkiste më shumë frymës bohemiane, të përzierë me glamurin e viteve ’80 (një kujtues i mirë në këtë rast është edhe imazhi i Grace Jones). Kombinimi me çizme na largon vëmendjen nga modelet e para në sezonin e shkuar, ndërsa parakalimi i modeleve të Saint Laurent në pasarelë nuk mund të largohet lehtë nga mendja…!
Dior dhe ikona feministe
Maria Grazia Chiuri, këtë herë i qendroi besnike frymës feministe, të pikasur më së shumti sezonin e kaluar. Bluzat me mëngë të shkurtra, me printimin e frazës “We all should be feminists” (të gjithë duhet të jemi feministë), u inspiruan nga libri me të njejtin titull i autores nigeriane Chimamanda Ngozi Adichie. Duke ndjekur po të njejtën logjikë, modelet e prezantuara në Paris mbanin përsipër shkrimin “Why have there no been great ëomen artists?” (pse nuk ka patur ndonjëherë femra të mëdha artiste?), një citim i një prej artikujve të vitit 1971, nga Linda Nochlin.
Balmain solli vetëm dhe vetëm glamur…
Koleksioni konsistonte më së shumti në kombinimin bardh e zi dhe vijat. Nuk mungoi as materiali plot shkëlqim, ndërsa modelet që spikatën mbi pasarelë ishin Natalia Vodianova, Joan Smalls, Alessandra Ambrosio dhe Karolina Kurkova.
