Kryeredaktori i gazetës së pavarur Novaya Gazeta – me bazë në Moskë – Dmitry Muratov, do ta nxjerre në ankand medaljen e tij të Çmimit Nobel, me qëllim mbledhjen e fondeve për refugjatët ukrainas, të cilët jane larguar për shkak të pushtimit të paprovokuar të Ukrainës nga ana e Rusisë. Muratov, i cili është nderuar me Çmimin Nobel për Paqe më 2021, për betejën e tij që të ruajë të vërtetën si gazetar, e ka bërë të ditur këtë njoftim në gazetën e tij.
“U bëj thirrje grupeve të ankandeve, që janë të interesuara për këtë çmim të njohur në gjithë botën, të na kontaktojnë neve”, ka thënë Muratov, i cili ka fituar çmimin bashkë me Maria Ressan, bashkëthemeluese e faqes Rappler, e cila njihet si platformë kundër Qeverisë së Filipineve.Muratov dhe Novaya Gazeta kanë bërë të ditur këtë njoftim, duke bërë thirrje edhe për zbatim të pesë masave në Ukrainë: armëpushim, shkëmbim të të burgosurve, riatdhesimin e të vdekurve, krijimin e korridoreve humanitare dhe ofrimin e ndihmës për refugjatët”.
Dhjetëra mijëra trupa ruse kanë pushtuar Ukrainën prej kur Moska ka nisur sulmet më 24 shkurt, kujton REL.Prej fillimit të marsit, Muratov dhe gazeta e tij kanë shmangur raportimin për situatën në Ukrainë për shkak të censurës dhe kërcënimit për gjykim penal të gazetarëve që nuk ndjekin linjën qeveritare.
Rregullatori rus i mediave, Roskomnadzor, e ka ndaluar përshkrimin e veprimeve të Rusisë si pushtim apo luftë dhe ka thënë se ato duhet të konsiderohen pjesë e “operacionit special ushtarak”.Një ligj i përkrahur së fundi nga presidenti rus, Vladimir Putin parashikon dënim me burgim në deri 10 vjet për individët e dënuar për shkelje të tilla.Dënimi për ato që autoritetet i konsiderojnë si “informacione të rreme” për ushtrinë ruse, të cilat çojnë në “pasoja serioze” shkon në deri 15 vjet burgim.
