Italia po hyn në një tjetër periudhë me temperatura ekstreme, ndërsa sinoptikanët paralajmërojnë se në fundjavë disa rajone jugore mund të përballen me vlera rekord të të nxehtit.
Sipas parashikimeve, një valë e fuqishme ajri të nxehtë që vjen nga Afrika e Veriut do të përfshijë të gjithë territorin italian. Në pjesën më të madhe të vendit temperaturat do të kalojnë 35 gradë Celsius, ndërsa në Sicili dhe Sardenjë pritet të kapin deri në 47 gradë.
Për shkak të kushteve ekstreme atmosferike, autoritetet kanë bërë thirrje për kujdes të shtuar, veçanërisht për grupet më të rrezikuara, si të moshuarit, fëmijët dhe personat me sëmundje kronike. Rekomandohet që qytetarët të kufizojnë daljet gjatë mesditës, të hidratohen vazhdimisht dhe të qëndrojnë sa më shumë në ambiente të freskëta.
Meteorologët parashikojnë se temperaturat e larta do të vazhdojnë për disa ditë, duke rritur ndjeshëm rrezikun e zjarreve në pyje, si edhe duke shtuar ngarkesën në rrjetin energjetik për shkak të përdorimit të lartë të pajisjeve të ftohjes.
