Një nga duelet më të mëdha të futbollit europian do të vendosë finalistin e parë të Kupës së Botës 2026. Franca dhe Spanja do të matin forcat në gjysmëfinale, në një sfidë që pritet të dhurojë emocione dhe futboll të nivelit më të lartë.
Kjo do të jetë ndeshja e 39-të mes dy kombëtareve. Historia favorizon lehtë Spanjën, e cila numëron 18 fitore, ndërsa Franca ka triumfuar 13 herë. Shtatë përballje të tjera janë mbyllur pa fitues. Megjithatë, në kompeticionet zyrtare diferencat janë minimale, me francezët që kanë pasur më shumë sukses në disa nga duelet më të rëndësishme.
Rivaliteti mes tyre është bërë edhe më intensiv vitet e fundit. Spanja mposhti Francën me rezultatin 2-1 në gjysmëfinalen e Euro 2024, ndërsa një vit më pas triumfoi 5-4 në Nations League, në një ndeshje spektakolare me nëntë gola.
Përballja e Botërorit 2026 shënon takimin e tretë radhazi mes Francës dhe Spanjës në një turne të madh, duke konfirmuar një rivalitet që tashmë është ndër më të fortët në futbollin europian. Në lojë është një biletë për finalen e madhe dhe asnjëra skuadër nuk pritet të bëjë lëshime.
