Edi Rama, në një nga rrëfimet më personale dhe prekëse të tij, tregoi një episod të rëndë nga jeta familjare – momentet kur djali i tij Gregu po përballej me një sëmundje të rëndë, duke kaluar edhe në komë mjekësore. Gjatë një bisede në podcast-in e tij, ku i ftuar ishte Kryepeshkopi Joan, kryeministri foli me emocione për ndjesitë e papërshkrueshme që përjetoi si prind.
“Im bir kaloi një moment mjaft dramatik me një kancer. Gjërat shkuan aq keq sa u fut në një koma mjekësore famaceutike. Nuk dihej a do të kthehej apo jo”, tregoi ai. “24 orët e para ishin tmerr. Çdo lajm i mundshëm mund të ishte një lajm i keq”.
Kryeministri kujtoi edhe një bisedë të paharrueshme me një mjeke të spitalit, e cila, përveç profesionit, tregoi edhe anën shpirtërore të kujdesit për pacientët.
“Kur e pyeta ‘Si vazhdon?’, ajo ngriti kokën dhe bëri me dorë lart. I thashë: ‘Çfarë po më tregon, tavanin? Po flas me një shkencëtare, jo me një prift’. Ajo më tha: Në këtë kat unë kam parë gjëra që shkenca nuk m’i ka shpjeguar dot akoma”.
Në spital, një vend të veçantë kishte edhe Kapela, ku personeli mjekësor mblidhej për t’u lutur për pacientët. “Na jep energji, më tha mjekja. ‘Quaje si të duash, por nga ajo zonë e misterit vijnë gjëra që nuk i parashikon dot dhe që nuk i shpjegon dot më vonë’”.
