Një ngjarje tragjike ka tronditur qytetin Fontana të Kalifornisë, ku një grua dhe partneri i saj u vranë me armë zjarri në parkingun e një restoranti sushi. Autori i dyshuar i ngjarjes ishte bashkëshorti i gruas, nga i cili ajo po divorcohej. Ai u qëllua për vdekje nga një zëvendës sherif jashtë detyrës, që ndodhej rastësisht pranë vendngjarjes.
Viktimat janë identifikuar si Gloria Zamora, 40 vjeçe, influencuese në rrjetet sociale dhe trajnere fitnesi, dhe Hector Garduno, 43 vjeç. Sipas autoriteteve, ata u qëlluan në parkingun e restorantit në Summit Avenue nga Thomas Alberto Tamayo Lizarraga, bashkëshorti i Zamorës.
Vetëm një javë para ngjarjes, Gloria kishte folur në podcastin Horizon për sfidat që po kalonte gjatë procesit të divorcit, duke inkurajuar ndjekësit e saj — veçanërisht gratë, të ruanin forcën fizike dhe mendore përballë vështirësive personale.
Policia e Fontanës raportoi se autori i krimit e kishte ndjekur Zamorën deri te restoranti, megjithëse ende nuk është e qartë si kishte zbuluar vendndodhjen e saj. “Ajo kishte qenë aty për rreth një orë,” tha oficeri Steve Reed.
Pas të shtënave, një zëvendës sherif i Qarkut San Bernardino, i cili ishte jashtë shërbimit por ndodhej pranë vendit të ngjarjes, ndërhyri menjëherë. Ai dëgjoi të shtënat, u kthye drejt skenës dhe gjatë përballjes me agresorin, e qëlloi për vdekje.
Ngjarja ka shkaktuar dhimbje të thellë në komunitet. Gloria Zamora ishte nënë e shtatë fëmijëve, ndërsa Hector Garduno kishte katër vajza. Vajza e Zamorës konfirmoi përmes një faqeje GoFundMe se autori i ngjarjes ishte njerku i saj. Të afërmit e të dy viktimave kanë hapur faqe për mbështetje financiare dhe për të nderuar kujtimin e tyre, duke i përshkruar si prindër të përkushtuar dhe figura frymëzuese për komunitetin.
