Menduat se kemi mbaruar me javën e modës në New York? Epo, gaboheni, pasi të tilla organizime ofrojnë aq shumë , sa të lë në vend për të folur edhe shumë ditë të tjera pas përfundimit të tyre. Oscar de la Renta, palltot, çantat, grimi…e së fundmi do të flasim për çizmet! Mos u habisni aspak nëse shumë shpejt do shihni modelin ‘cow boys’, të gjejë përdorim të gjerë rrugëve të qytetit!
Fatmirësisht për ne, rikthimi i pantallonave të stilit të tillë nuk ka mbërritur ende, e ndoshta me ca nota egoizmi, shpresojmë që asgjë e ngjashme të mos ndodhë deri sa të mos kemi më moshë për të veshur xhinse (eh!) Megjithatë , çizmet ‘cow boys’ nuk janë aspak të tmerrshme, sidomos nëse dini t’i kombinoni. Ngjyrat që spikatën më shumë ishin e kuqja dhe e bardha, ndërsa u vërejt kombinimi me funde, fustane dhe pantallona. Të gjata ose deri pak sipër kyçit, ky model pritet të adaptohet shumë shpejt nga të apasionuarit pas modës, dhe jo vetëm. Në galeri do të gjeni dhjetë modele çizmesh të tilla. Po ju, do të parapëlqenit të kishit një stil të ngjashëm në koleksionin tuaj të këpucëve?
