Një gjykatë spanjolle ka urdhëruar superyllin kolumbian të muzikës Shakirën të dalë në gjyq për një rast mashtrimi fiskal në një datë ende të pacaktuar, thanë autoritetet gjyqësore të martën.
Prokurorët në Barcelonë thanë në korrik se do të kërkonin një dënim me më shumë se tetë vjet burg kundër këngëtares dhe një gjobë prej afro 24 milionë eurosh, pasi ajo hodhi poshtë një marrëveshje për pranimin e fajësisë mbi akuzat për evazion fiskal.
Ata akuzojnë këngëtaren 45-vjeçare të “Hips don’t Lie” se ka mashtruar zyrën e taksave spanjolle me një vlerë prej 14.5 milionë euro nga të ardhurat e fituara midis 2012 dhe 2014. Prokurorët thonë se Shakira u transferua në Spanjë në vitin 2011 kur lidhja e saj me mbrojtësin e FC Barcelona, Gerard Pique u bë publike, por mbajti rezidencën zyrtare tatimore në Bahamas deri në vitin 2015.
Çifti, i cili ka dy fëmijë, njoftoi ndarjen e tyre në qershor. Në një intervistë të botuar në revistën Elle javën e kaluar, Shakira tha se ishte e bindur se ishte sjellë si duhet dhe nuk i detyrohej asgjë zyrës spanjolle të taksave. “Këto akuza janë të rreme,” tha ajo.
“Ndërsa unë dhe Gerard po takoheshim, isha në një turne botëror. Kam kaluar më shumë se 240 ditë jashtë Spanjës, kështu që nuk kishte asnjë mënyrë që të kualifikohesha si banore,” shtoi ajo.
Avokatët e Shakirës kanë thënë se deri në vitin 2014 ajo fitonte pjesën më të madhe të parave të saj nga turnetë ndërkombëtare, u transferua në Spanjë me kohë të plotë vetëm në vitin 2015 dhe ka përmbushur të gjitha detyrimet e saj tatimore. Këngëtarja thotë se ka paguar 17.2 milionë euro në taksat spanjolle dhe nuk ka borxhe të papaguara.
