Dy persona kanë humbur jetën dhe të paktën 19 të tjerë janë plagosur pas një aksidenti të rëndë që ndodhi të shtunën mbrëma, kur një anije stërvitore e Marinës Meksikane u përplas me Urën e Bruklinit.
Sipas kryebashkiakut të New York-ut, Eric Adams, anija me vela Cuauhtémoc humbi energjinë elektrike ndërsa po kalonte poshtë urës ikonike. Në bord ndodheshin 277 persona në momentin e aksidentit.
Pamjet nga vendngjarja tregojnë momentin kur direkët e mëdhenj të anijes godasin dhe prekin strukturën e urës. Sipas autoriteteve, disa anëtarë të ekuipazhit ndodheshin mbi direkë në kohën e përplasjes, duke shkaktuar rrëzimin e tyre në kuvertë.
Nga të plagosurit, dy persona janë në gjendje kritike. Hetimet për shkakun e humbjes së energjisë elektrike në anije janë duke vazhduar.
