Argjentina ka siguruar një vend në çerekfinalet e Kupës së Botës pas një fitoreje spektakolare 3-2 ndaj Egjiptit, në një ndeshje me përmbysje të madhe dhe emocione deri në sekondat e fundit.
Egjipti e nisi sfidën në mënyrën më të mirë të mundshme, duke kaluar në avantazh 2-0. Ibrahim hapi serinë e golave në minutën e 15-të, ndërsa Ziko dyfishoi rezultatin në minutën e 67-të, duke e vënë Argjentinën në një situatë shumë të vështirë.
Megjithatë, kampionët në fuqi reaguan me karakter. Edhe pse Lionel Messi humbi një penallti në pjesën e parë, ai u bë protagonist në momentet vendimtare të takimit. Fillimisht shërbeu asistin për Cristian Romero, i cili ngushtoi diferencën në minutën e 79-të, ndërsa vetëm katër minuta më vonë realizoi vetë golin e barazimit për 2-2.
Kur ndeshja dukej se po shkonte drejt kohës shtesë, Enzo Fernández shënoi golin e fitores në minutën e 92-të, duke vulosur përmbysjen e madhe dhe kualifikimin e Argjentinës në fazën tjetër të turneut.
Në çerekfinale, skuadra e Lionel Messit do të përballet me fituesen e sfidës mes Kolumbisë dhe Zvicrës.
