Filmi i animuar “Minions & Monsters” nga Universal dhe Illumination ka kryesuar ‘box office’ në SHBA gjatë fundjavës së Ditës së Pavarësisë, duke u renditur në vendin e parë si filmi më i shikuar.
Produksioni ka arkëtuar rreth 14.7 milionë euro në 4.243 kinema në Amerikën e Veriut, ndërsa parashikimet tregojnë se të ardhurat mund të arrijnë rreth 36.3 milionë euro vetëm gjatë fundjavës. Në tregjet ndërkombëtare, filmi pritet të shtojë edhe rreth 80 milionë euro të tjera, duke forcuar suksesin e sagës “Minions”, e cila ndër vite ka sjellë fitime të mëdha globale me tituj si “Despicable Me 4”, “Minions: The Rise of Gru” dhe “Minions”.
Në vend të dytë renditet “Toy Story 5”, i cili në fundjavën e tretë të shfaqjes ka arkëtuar rreth 12 milionë euro vetëm të premten dhe pritet të arrijë rreth 29.4 milionë euro deri në fund të javës.
Vendi i tretë i takon filmit “Young Washington”, me rreth 6.8 milionë euro të arkëtuara dhe një projeksion prej 14.7 milionë eurosh deri në fund të fundjavës.
Në vendin e katërt është “Supergirl”, i cili ka shënuar rënie në të ardhura, duke grumbulluar rreth 3.3 milionë euro dhe duke pritur të mbyllë javën me rreth 8 milionë euro.
Ndërsa në vendin e pestë renditet “Disclosure Day”, me rreth 2 milionë euro të arkëtuara dhe një parashikim prej 5.1 milionë euro deri në fund të fundjavës. Pas katër javësh në kinema, filmi pritet të arrijë rreth 95.7 milionë euro në tregun e Amerikës së Veriut.
