Finalja për vendin e tretë në Kupën e Botës 2026 u shndërrua në një nga ndeshjet më të paharrueshme të turneut. Anglia triumfoi 6-4 ndaj Francës në një përballje plot ritëm, emocione dhe përmbysje, duke siguruar medaljen e bronztë dhe një vend në historinë e Botërorit.
Takimi i zhvilluar në Miami vendosi një rekord të veçantë, pasi ishte ndeshja e parë në një Kupë Bote që prodhoi 10 gola ose më shumë që nga viti 1982. Për herë të parë pas 44 vitesh, një sfidë e Botërorit arriti shifrën dyshifrore të golave.
Kjo e rendit Francë–Angli 4-6 mes vetëm gjashtë ndeshjeve në historinë e Kupës së Botës që kanë regjistruar të paktën 10 gola:
Austria 7-5 Zvicra (1954) – 12 gola
Brazili 6-5 Polonia (1938) – 11 gola
Hungaria 8-3 Gjermania (1954) – 11 gola
Hungaria 10-1 El Salvadori (1982) – 11 gola
Franca 7-3 Paraguai (1958) – 10 gola
Franca 4-6 Anglia (2026) – 10 gola
Ndeshja nisi me dominimin absolut të Anglisë, që e mbylli pjesën e parë me avantazhin e thellë 4-0. Megjithatë, Franca nuk u dorëzua dhe në pjesën e dytë riktheu emocionet, duke ngushtuar diferencën deri në 5-4 dhe duke rihapur plotësisht sfidën.
Kur dukej se minutat e fundit do të ishin dramatike, Jude Bellingham shënoi golin e gjashtë në kohën shtesë, duke vulosur fitoren 6-4 për “Tre Luanët” dhe duke i dhënë fund një ndeshjeje që tashmë konsiderohet ndër më spektakolaret në historinë e Kupës së Botës.
Përveç medaljes së bronztë, Anglia largohet nga turneu edhe me një rekord që do të mbahet mend gjatë: pjesë e një sfide me 10 gola, diçka që nuk ishte parë në një Botëror prej më shumë se katër dekadash.
