Kristin Cabot, 53 vjeçe dhe nënë e dy fëmijëve, thotë se jeta e saj ndryshoi plotësisht pas një momenti të shkurtër gjatë një koncerti të Coldplay në stadiumin Gillette të Bostonit, në korrik të vitit 2025.
Në një video 16-sekondëshe të transmetuar nga “kiss cam”, Cabot u filmua duke përqafuar shefin e saj të atëhershëm në kompaninë Astronomer, Andy Byron. Situata mori edhe më shumë vëmendje pasi këngëtari Chris Martin bëri një koment me humor, duke aluduar për një lidhje mes tyre.
Pamjet u përhapën me shpejtësi në rrjetet sociale, duke grumbulluar mbi 130 milionë shikime. Pak kohë më pas, si Cabot ashtu edhe Byron dhanë dorëheqjen nga postet e tyre.
Sipas një interviste të dhënë për The Boston Globe, Cabot tregon se ishte ndarë nga partneri disa javë përpara koncertit, por kjo nuk ndikoi në mënyrën se si u perceptua publikisht. Ajo nuk arriti të rikthehej më në punë dhe, një vit pas skandalit viral, ende nuk ka gjetur një angazhim të ri profesional.
Ish-drejtoresha thotë se aktualisht po jeton me kursimet personale, duke përdorur edhe fondet që kishte rezervuar për studimet universitare të fëmijëve dhe për pensionin.
Përveç vështirësive financiare, Cabot rrëfen se u përball edhe me një valë të madhe sulmesh në internet, ku u etiketua me ofendime të ndryshme, përfshirë edhe si “gjuetare pasurie”.
Ajo zbulon se vetëm në qershor të vitit 2026 gjeti kurajën të ndiqte sërish një koncert, këtë herë të Jack Johnson. Ndërkohë, pohon se që nga dita e videos virale nuk ka pasur më asnjë kontakt me ish-shefin e saj, Andy Byron.
