Barbara Palvin dhe Dylan Sprouse po përgatiten të bëhen prindër të një vajze. Çifti i njohur ka zbuluar gjininë e fëmijës së tyre të parë gjatë episodit premierë të podcastit të ri të aktorit, “Wildmen”.
Gjatë bisedës, modelja e pyeti bashkëshortin nëse dëshironte ta ndante lajmin me publikun. Sprouse konfirmoi më pas se ata janë në pritje të një vajze, duke zbuluar gjithashtu nofkën e ëmbël me të cilën e thërrasin aktualisht.
“Principessa”, që në italisht do të thotë “princeshë”, është emri përkëdhelës që çifti ka zgjedhur për vogëlushen deri në momentin kur të vendosin emrin përfundimtar.
Aktori u shpreh mjaft i emocionuar për faktin se do të bëhet baba i një vajze, ndërsa Palvin bëri shaka duke thënë se ardhja e saj në jetë mund ta bëjë Dylanin më të qetë. Ai iu përgjigj me humor se është tashmë gati edhe për festa çaji me të bijën.
Pavarësisht se kanë zbuluar gjininë e fëmijës, Barbara dhe Dylan ende nuk kanë vendosur se si do ta quajnë vajzën e tyre. Sipas çiftit, ata vazhdojnë të diskutojnë dhe të ndryshojnë mendim për emrin që do të zgjedhin.
Dyshja nuk ka bërë të ditur ende datën e pritshme të lindjes, por mënyra e relaksuar dhe me humor me të cilën kanë folur për prindërimin ka treguar entuziazmin e tyre për kapitullin e ri që i pret.
Barbara Palvin e bëri publike shtatzëninë në muajin maj, kur u shfaq në tapetin e kuq të Festivalit të Filmit në Kanë duke ekspozuar barkun e rrumbullakosur.
Lajmi shënoi një moment të veçantë për çiftin, i cili nisi lidhjen në vitin 2018 dhe kurorëzoi dashurinë me martesë në Hungari, në korrik të vitit 2023. Vajza do të jetë fëmija i parë si për modelen, ashtu edhe për aktorin.
Përpara shtatzënisë, Barbara Palvin kishte folur publikisht edhe për betejën e saj me endometriozën, për të cilën iu nënshtrua një ndërhyrjeje kirurgjikale.
Modelja ka treguar se kjo përvojë e bëri më të vëmendshme ndaj trupit dhe shëndetit të saj, duke inkurajuar gratë që të kërkojnë diagnostikim të hershëm dhe ndihmë nga mjekët specialistë.
Gjatë një tjetër bisede në podcast, Palvin foli edhe për ndryshimet fizike dhe emocionale që përjetoi në fazat e para të shtatzënisë. Ajo pranoi se ishte përballur edhe me pasiguri lidhur me ndryshimin e trupit, përpara se lajmi të ndahej me publikun.
